Pris til Norsk Stein

Produksjonssjef Gunnar Kvåle, attføringsleiar Greta Haga, operatør Goran Opacic, operatør Tor Kåre Møgedal, personalsekretær Anne Straabø Tjordal og attføringsrettleiar Anne Elisabeth Holgersen.

Norsk Stein er kåra til årets samarbeidsbedrift 2011 av attføringsbedrifta Rysteg og blir heidra for inkluderande haldningar.

  Det er første året Rysteg as deler ut ein slik pris i Suldal. Den årlege prisen blei først delt ut i 2010, då til Brakamoen barnehage i Sauda. Og for året 2011 blir det nå gitt to prisar; ein til Technor i Sauda og ein til Norsk Stein i Suldal.

Verdifulle haldningar

Rysteg fungerer som eit bindeledd mellom NAV og arbeidslivet og har 70 tiltaksplassar fordelte i kommunane Sauda og Suldal. For å kunna få sine arbeidssøkjarar tilbake i arbeid, er attføringsbedrifta avhengig av velvilje frå bedriftene.

  – Å få folk ut i ordinære bedrifter er det som gir resultat, seier Greta Haga, attføringsleiar i Rysteg. Ho synest det er flott å kunna visa til det gode samarbeidet med Norsk Stein og håpar endå fleire bedrifter kjem på banen.

  – Og så er det viktig å få med at Rysteg gjer ei nøye vurdering av arbeidssøkjarane på førehand og ser kva den enkelte passar og kvalifiserer til. Det er ikkje slik at me sender kven som helst kor som helst, poengterer attføringsrettleiar Ann Elisabeth Holgersen.