Tok bonde-debatten

Ingar Naustvik, ståande bak, fekk støtte frå mange om å la eit mjølkeprosjekt få heile aksjonsplanpotten ein periode for å snu den negative trenden. I gruppa ser me frå venstre Ole Martin Eikeland, Bjarne Østerhus, Ingar Naustvik og Klara Bakka.

Denne veka møttest bønder frå heile Suldal for å snakka om framtida si.

  Ingard Naustvik leia møtet då mjølkebønder i Suldal samla seg for å komma med innspel til revisjonen av Aksjonsplan for landbruket i Suldal. Bønder har aldri vore del av den store gråe massen, og samlar du 26, får du eit fint knippe svar også.

Ryggrada

– Politikk er å velja, slik forklarte Naustvik utspela sine og viste til nødvendigheita av å ta tak for å sikra det ordføraren kallar "ryggrada i Suldalslandbruket”, siterte Naustvik. Han minte om at å velja, betyr også å velja bort.

  Og møtelyden var ikkje framand for tanken om å gjera eit krafttak for mjølka. Jone Moe sa det slik:

  – Forsvinn kvota frå garden, kan du ikkje starta på nytt. Det gjer næringa spesiell.

Ulike påstandar

På dette tidspunktet var møtelyden delt inn i grupper som fekk ulike påstandar å forhalda seg til. Fleire støtta observasjonen til Moe, og gruppa til både Bjørn Kjetil Askvik, Per Even Tjøstheim og Ole Martin Eikeland føreslo å prioritera mjølkebruka med heile potten frå aksjonsplanen over ein 4-5 års periode. For i etterkant å evaluera resultatet.

  Eikeland si gruppe trudde ikkje det vil vera muleg å oppretthalda talet på bruk i Suldal, og meinte tilskota måtte vera for utvikling.