Opprørte over helge-tvang

Solveig H. Brattland trivst godt i arbeidet sitt, men ho og dei andre tilsette ved Vinjar bu- og omsorgssenter fryktar for at det gode miljøet skal forvitra når kommunen vil tvinga dei til å gå fleire helgevakter. Her under middagen med f. v. Anna Nerheim, Solveig A. Fisketjøn, med ryggen til Ragnhild Thingvoll og Valborg Berge. Foto: Arne Vestbøstad.

Dei tilsette på Vinjar bu- og omsorgssenter meiner det er djupt urettferdig at dei nå skal påtvingast fleire helgevakter.

  Vinjar bu- og omsorgssenter har lenge slite med stor arbeidsbelastning og gleda var stor då institusjonen fekk auka grunnbemanninga med 2, 4 stillingar i budsjettet.

  Men så langt er stillingane ikkje lyste ut. Nå er det klart at berre ein stilling skal lysast ut, medan resterande 1, 4 stillingane skal fyllast av dei som alt jobbar der. Gjennom auka stillingar og tettare helgevakter. I dag arbeider dei tilsette kvar tredje helg, frå hausten blir det oftare. Eitt av forslaga er ein turnus på ni veker med annakvar helg, tre helger av, nye ni veker med annakvar helg, og så vidare.

Stort sett 75 prosent

Djupt urettferdig, synest dei tilsette som har forfatta eit brev stila til kommuneleiinga og politikarane der dei spør om det er lov å påleggja dei fleire helger.

  – Stort sett går dei aller fleste her i 75 prosent eller meir. Det er ingen som klarer å gå i 100 prosent utan å bli sjukmelde, og det er ingen som vil ha fleire helgevakter. Me  har familie og barn og eit liv utanom jobben, seier Solveig H. Bratland som har ført brevet i pennen.

  Ho fortel at nokre av dei tilsette også har vore hjå ordføraren, men at han ikkje kunne lova dei hjelp.

  – Han sa vel at kommunen har vedtatt at deltida skal ned.