Slit på Foldøy

Bygdeutviklingssjef Endre Gjil (heilt til høgre i biletet) slit med å få orden på dei ulovlege bygga på Foldøy. Her frå synfaringa med politikarane hjå Torgeir Sømme (kvit trøye) i august 2010.

Rivefristen for dei ulovlege bygga på Foldøy vil midt i april komma og gå utan konsevensar. Bygdeutviklingssje Endre Gjil er oppgitt.

  Etter snart to år med fram og tilbake rundt dei ulovlege bygga til Torgeir Sømme, står både annekset og badehuset like brisne. Og vil kanskje aldri bli rivne.

Feilbehandla

Får Sømme lov til å gjera om den lovleg bygde hytta om til heilårshus, kan dei nå ulovlege bygga attmed bli del av buarealet på øya der Fylkesmannen har godkjent hus på 300-400 kvadratmeter på tvers av kommunens vilje.

  Kommunen har sagt nei til omgjering, men Fylkesmannen har oppheva vedtaket. Grunnen er at saka er behandla feil; saka skulle vore behandla som ei dispensasjonssak.

  Så lenge omdisponeringsspørsmålet ikkje er avgjort, kan ikkje kommunen effektuera riving, rett og slett fordi dei aktuelle bygga kan bli del av eit heilårshus, viss Sømme til slutt får medhald.

Fylkesmannen på tvers

Bygdeutviklingssjef Endre Gjil er oppgitt.

  – Nå følest det som at Fylkesmannen seier nei der me seier ja, og ja der me seier nei. Grunngivinga i avslaget er akkurat det same som det ville vore i ei dispensasjonssak, meiner Gjil. Han konstaterer at kommunen har gjort ein formell feil, men er oppgitt over at Fylkesmannen i praksis stikk kjeppar i hjulet for kommunen.

  – Arbeidet med å følgja opp ulovlege saker, blir vanskeleggjort, meiner Gjil som ikkje har sjekka om badebassenget er fylt igjen, slik Sømme har sagt.

  – Kvifor ikkje?

  – Me skal gjera det når alt dette er avklart, varslar Gjil, som nå har kontakta Sømme og bede han søkja dispensasjon.

  – Og rivefristen spelar inga rolle lenger?

  – Fristen står ved lag, men ein kan vurdera å utsetja den. Ei omgjering av hytta til heilårsbustad vil bli eit nytt moment i saka og kan få betydning. 

  Ein ny søknad skal behandlast av LMT-utvalet.