Jelsa-entusiasten

Notèr det breie smilet Johne Johnsen vartar opp med når han spurtar etter morgonbåten på veg frå heimen på Jelsa til jobben på Tananger.

Engasjert Jelsa-patriot, Johne Johnsen, er svært nøgd med å sjå gravemaskinar i sving på Jelsa. Nå gjenstår berre eit betre kommunikasjonstilbod så endå fleire vil til bygda.

  Johnsen nyt utsikta frå huset og gler seg over aukande aktivitet i det nye byggjefeltet på Svehaugane på Jelsa. Fleire tilflyttarar kjem med flyttelass, både frå Stavanger, Sola, Jæren, Erfjord og Sand. Men Johnsen trur interessa for Jelsa hadde vore endå større dersom kommunikasjonen hadde vore betre.

Pendlar til Tananger

I fjorten år har Johnsen pendla til arbeid i Stavanger-området. Og han trivst. Men reaksjonar frå kollegaer, det får han stadig vekk.

  – Dei kan ikkje forstå at eg orkar, seier Johnsen, som er meir overraska over kollegaene.

  – Eg spør alltid kva tid dei sjølve kjem heim frå arbeid. Halv fem-fem er svaret. Det gjer eg òg! seier eg. Då blir dei overraska, ler den erfarne pendlaren.

  Det har si forklaring. Johnsen tek hurtigbåten frå Jelsa klokka åtte om morgonen og er i Stavanger kvart over ni. Der står motorsykkelen i parkeringshuset, og Johnsen fresar av garde i kollektivtrafikkfila som er kø-fri og lovleg for motorsyklistar å ferdast i. Halv ti sit han i kontorstolen på Halliburton på Tananger. Kvar dag. Oppdatert seg har han gjort gjennom internett på båten. Han har ein grei arbeidsgjevar, som legg til rette for pendlarar. Allereie klokka tre kan Johnsen tre av frå kontoret. Og på veg heim kan han sitja i fred og ro på hurtigbåten og gjera dagens siste arbeidsoppgåver. Turen går fort. Kvart på fem går han i land på Jelsa og er snart i heimen og kan igjen nyta den flotte utsikta han meiner ikkje finst makan til andre stader, og som absolutt er verdt å pendla for.