Gullingen får livreddar

Sanitetsforeininga tek i mot lopper frå private heimar heile året og sat plutseleg med eit overskot av flotte lopper. Etter å ha lest i lokalavisa om engasjementet for ein hjartestartar på Gullingen, sette dei i gang ein ekstra marknad sist laurdag for å støtta arbeidet. 

Nyttig marknad 

Om føremiddag var det kø utanfor Sanitetslokalet allereie før dei opna.

  Det var kjekt å sjå så mykje folk. Etter berre ein time byrja det å minka veldig på lopper, seier kontaktperson i Sand sanitetsforeining, Guri Grov. Ho kunne telja 21 000 kroner etter at dagens siste loppe blei selt. 

 Om lag ti frivillige frå sanitetsforeininga stod bak marknaden, og dei er svært glade for å kunna hjelpa til med å få ein ny hjartestartar til kommunen. 

Leveringstid

Geir Brustveit i Suldal Røde Kors var raskt på tråden etter loppemarknaden, for å dela gladmeldinga. 

  Så snart beløpet frå Sand sanitetsforeining er overført, bestiller me ein hjartestartar som vil bli sett opp ved hovudinngangen ved Gullingen Turistsenter. Her er det mykje folk året rundt, seier Brustveit som ser føre seg at livreddaren vil vera på plass i løpet av mai månad.    

Mange engasjerte

Arbeidet med å få ein hjartestartar til Gullingen har engasjert fleire. 

 e har fått inn beløp frå både Mosvatnet hytteforeining, Haugesund Caravanklubb, frå dei som har campingvogner ståande i området, og frå andre privatpersonar, seier Brustveit. Suldal Røde Kors kjem til å halda kurs i bruk av livreddaren gjennom eit førstehjelpskurs, når det nærmar seg haust og vinter igjen.  

Tilfelle der hjartestartar blei nytta

Brustveit opplyser at ein av hjartestartarane som er i kommunen er nytta i eitt tilfelle. Han veit om fleire andre tilfelle der ein hjartestartar kunne vore aktuell for å redda liv, men der beredskapen var tidleg på plass for å hjelpa.