Samla seg om 1. mai

Det slutta med allsong ”Din tanke er fri” under markeringa 1. mai på Sand.

Vel 45 møtte fram til den årlege 1. maimarkeringa på Sand, i foajeen på Kulturhuset. Første appell var ved Emilie Bersaas, politisk rådgjevar for AUF. Ho peikte på samfunnsengasjement som nøkkelen til eit godt samfunn, og som det riktige svaret til angrepet på hennar parti 22. juli i fjor. Ho tok vidare fram samarbeidet med fagrørsla, og gjekk i appellen sin særleg inn for lovfesta rett til lærlingplass.

  – Me vil ha eit auka fokus på yrkesfagleg utdanning, med sikrare tilhøve og betre garantiar for at unge får avslutta den utdanninga dei byrjar på, altså ein lærlingplass og eit fagbrev, utdjupar ho i samtale etter appellen.

  – Det må òg bli høgare status å ta fagbrev, det er altfor mange som i dag tek allment påbygg fordi dei føler dei må ta høgare utdanning, held ho fram.

Kommunane er nøklane

Øystein Hansen, fylkessekretær for LO i Rogaland og hovudtalar for dagen, sit ved sida av og seier seg samd i Bersaas si utsegn.

  – Så mange som 50 til 70 prosent av elevane i påbyggsklassane stryk, noko som er unødvendig, då må me heller auka statusen til fagbrevet. Men ei konkret lovfesting av rett til lærlingplass er komplisert, der stiller me oss i LO annleis. Hovudmålet er å få til fleire lærlingplassar, held han fram. Bersaas seier seg samd i at dette er det viktigaste, og peiker særleg til kommunane som nøkkelspelarar i å få til fleire lærlingplassar.