Lokalt næringsliv med på veglaget

Eit førebels kart over vegane har alt hengt ei stund på kontorveggen til Jan Moen, med løfte om stabil arbeidstilgang. Nå startar arbeidet med detaljane for det endelege kartet.

Jan Moen i BG Suldal gler seg stort over at bedrifta skal vera underleverandør til tilførslevegane til Sandsfjordbrua. Kruse Smith leverte det lågaste anbodet og vart innstilt som hovudentreprenør. Med seg på laget har dei egersundfirmaet Bertelsen og Garpestad. Dei vil i sin tur bruka BG Suldal til å utføra mesteparten av maskinarbeidet på vegdelen av prosjektet.

Vinterarbeid viktig

Det viktigaste for Moen er ikkje plent verdien på kontrakten, men stabiliteten i arbeidstilgangen.

  – Nå veit me at me har arbeid året rundt i to år, om vintrane òg. Slik har det ikkje vore dei to føregåande vintrane. I sju månader kan me arbeid, og i fem månader lurer me på korleis me skal sysselsetja folk. Det er ikkje kjekt, og me ser tydelege utslag på årsresultatet dei åra me har aktivitet på vintrane. Det går ikkje å grava grøfter i frosen mark. Med dette prosjektet treng arbeidarane våre ikkje å reisa lengre enn ein halvtime. Det er ei spesiell rase som reiser rundt frå anlegg til anlegg, men det går ikkje når ein har familie. I tillegg veit arbeidarane kor dei skal vera i den perioden, og det trur eg er godt for dei.

  Den lokale tilknyttinga trur han òg hadde noko å seia.

  – Me har den styrken at me alt er her. Difor blir det ikkje noko styr med å frakta maskinar og mannskap inn hit.