Tap og vinn med samme sinn

Varsku her! Frisparket fyk av garde og stoppar ikkje før det smell i nettet. 1-0. Frå venstre: Jun Hagen, Elias Kjølvik, Mia Lunde, Tobias Holmen og Thomas Kvæstad. Dommar Daniel Cremer (bak) ser til at alt går rett for seg.

Om våren er det mange kjekke ting som skjer. Noko mange synest er kjekt, er at Suldalsserien har starta opp att. Og eitt av oppgjera i første runde var miniknottkampen mellom Haugil og Suldal 2 på Kjølvikstølen.

Forfall

Ingen av laga kunne stilla med full tropp. Suldal 2 hadde på grunn av forfall akkurat nok spelarar med seg over fjorden til å stilla med fire utespelarar og ein målmann. Haugil på si side, hadde ein spelar som akkurat hadde tatt av gipsen på armen etter eit trampolinerelatert uhell, og var uaktuell. Likevel klarte laget å stilla med tolv spelarar.

Lenge jamn

Første omgang starta med mykje kjemping. Lenge stod kampen og vippa, men etter som klokka tikka mot pause, kom Haugil til stadig fleire sjansar. Då heimelaget fekk frispark rett utfor målfeltet, klarte dei å lura ballen i mål. På slutten av omgangen klarte dei blåkledde å skåra eitt mål til, slik at til pause stod det 2-0 til Haugil. Då andre omgang starta, fortsette Haugil der dei slapp før pause. Rett frå avspark gjekk dei opp og skåra 3 -0-målet. T rass den vanskelege starten gav ikkje Suldal 2 opp. Dei kjempa tappert og klarte å halda unna resten av omgangen, slik at 3-0 vart ståande til slutt.