Fleire kritiske innspel

Norsk Stein ønskjer å sleppa ut meir støv i fjorden, men fleire faginstansar saknar betre utgreiing. Foto: Gunhild Aksdal.

Av Arne Vestbøstad

Dei to siste uttalane er frå faginstansane Havforskningsinstituttet (HI) og Fiskeridirektoratet. Norsk Institutt for vannforskning (NIVA) si utgreiing om Sandsfjorden som ein god plass å deponera restproduktet frå produksjon til Norsk Stein får seg fleire skot for baugen.

Saknar straummålingar

Begge stiller spørsmål ved straummålingane som blir lagde til grunn. Spesielt Havforskingsinstituttet går i rette med målingane, som er frå perioden 1973-75. Instituttet gjer eit poeng av at desse målingane fortel om ein sterkt ferskvasspåverka utgåande brakkvasstraum og ein underliggjande, inngåande kompensasjonsstraum.

Fryktar oppvirvling

Poenget til HI er at Statkraft etter den tid har sleppt vatnet frå kraftproduksjonen i Hylen ut i Hylsfjorden, og at det følgjeleg er meir ferskvatn i fjorden som sig ut, og at kompensasjonsstraumen dermed aukar. Det blir nemnt at lokale fiskarar rapporterer om sterk straum i området. Instituttet viser vidare til ein studie av Universitetet i Bergen som har sett på kva effektar Ulla–Førre-utbygginga har hatt på fjordsystemet frå 1992, som ikkje er nemnt i søknaden. Kopla saman med at massane som skal sleppast ut frå Norsk Stein skal gli ned ei skråning til djupare område enn utsleppet på 50 meters djup i sitt eige tempo, fryktar Havforskingsinstituttet og Fiskeridirektoratet konsekvensane av ei oppvirvling av massane, og at straumen vil føra dei utover eit stort område.