Viking stiller med heile mannskapet

– Keeper Frode Olsen startar for oss i mål og me legg opp til ein rotasjon gjennom kampen slik at alle skadefrie spelarar får koma seg ut på grasmatta, fortel speleutviklar og assistenttrenar i Viking, Geir Lunde. Sjarmoffensiv i Suldal Assistenttrenaren gler seg til suldalsvitjinga og lovar at Viking skal gjera sitt for å skapa ei festleg ramme rundt rogalandscup-oppgjeret. – Det er viktig for oss å marknadsføra Viking på ein fin måte hjå gode naboar I Suldal, seier Lunde som ikkje akkurat fryktar tap for laget på bortebane. Han lovar rikeleg høve til både fotballhelt-møter på nært hald og autografskriving for Vikingsupportarar som stiller i Prestavikjo torsdag. – Det skulle berre mangla. For oss i Viking er det ikkje heider og pengar som er motivasjonen for å delta i Rogalandscupen, men det å få treffa folk og visa fram Viking, understrekar Lunde. Vil setja Suldal på kartet Leiar i fotballgruppa i Suldal IL, Svein Øystein Berge ser heimekamp mot Viking som eit utmerka høve til å skapa blest om Suldal og fotballfest i Prestavikjo. – Me satsar på folkefest og trur me kan samla 200 –300 tilskodarar torsdag. Uansett resultat av kampen er dette ein kjempeinspirasjon for fotballmiljøet og bygda vår, seier Berge som har kontakta regionsavisene og NRK Rogaland i håp om å få så mykje blest som mogleg rundt kampen.