Yter pengar til Topp-volley

Sandbuen Reidun Korsvoll, Ap, skal vera med og diskutera forslaget i Utdannings- og kompetansekomiteen 12. februar. Der føler ho seg trygg på utfallet. – Utvalsmedlemmene har tidlegare vist ei svært positiv innstilling til volleyballinja, seier ein optimistisk fylkespolitikar som jublar over forslaget. Ho viser til Fylkestinget sin velvilje og kan ikkje sjå at nokon der går mot. Når Fylkesrådmannen vil gå inn med prosjektmidlar, er det fordi ho ser volleyballinja i eit vidare perspektiv, refererer Korsvoll. Fredriksen sin intensjon er 1; at linja skal vera ei vitamininnsprøyting for bygda og 2; gje impulsar til vidareutvikling av idrett generelt. Dette skal prosjektet medverka til. Forslaget inneber at Fylket løyver 400 000 prosjektkroner i tre år. Rådmannen har konkretisert tankane sine ved å peika på moglege satsingsområde innan prosjektet som å invitera utanlandske ungdomar til treningsopphald, meisterskapsarrangement, turneringar, nasjonale samlingar på juniornivå og sponsorsamlingar. Forslaget frå rådmannen skal opp til endeleg avgjerd i Fylkestinget 24. februar.