Høgt nivå på alle plan

Prosjektleiar ved Sauda vidaregåande skule, Hans Hylen Solberg og landslagstrenar Dariusz Marszalek, gler seg over den overveldande responsen linja har fått. Begge føler seg sikre på oppstart til hausten med ein eller to klassar med 15, minimum 10 elevar av kvart kjønn. Når dei i tillegg er svært nøgde med søkjarane til trenarjobbane, står berre det viktigaste att; å gjera ein så god jobb at linja vert ein suksess. – Frå første stund av! ivrar Hylen Solberg. – Me må satsa på topp kvalitet frå dag ein. Elevane må vita at dei reiser til noko som er definitivt betre enn tilbodet dei alt har, elles skal dei sjølvsagt vera heime. Dette legg skulen tilrette for ved å lausriva Solberg frå anna undervising i år. – Marginane er små. Me må ha det beste heile vegen. Trenarane er ein viktig suksessfaktor. Lista har fleire svært interessante namn, og me håpar på å få dei beste frå den til jobbane, seier Hylen Solberg. Tilsettingsprosessen startar så snart ein meiner alle søknadene har nådd fram, og Solberg håpar på rask avklaring. Full kontroll Landslagstrenar Dariusz Marszalek meiner at ved å satsa på ein sentral læreinstitusjon, kan ein oppnå den perfekte kombinasjon av utdanning og idrettssatsing. På same måte som mange andre land i Europa satsar. Det er i desse landa ein finn laga som hevdar seg på toppnivå internasjonalt. – Ved å samla elitespelarane på sentralskular, seier landslagstrenaren, men legg til at elevane beheld heimeklubben. Slik kan dei representera sine eigne klubbar i nasjonale meisterskap. Sjølv om Sand er tenkt vera hovudbasen for landslagturneringar og treningssamlingar, er volleyballforbundet opne for andre søkjarar som ønskjer å stå som arrangørar for ulike arrangement. Fadderordning Hylen Solberg er nøgd med at idrettslaget Sand stiller som ein av fadrane til ToppVolley. Læraren er opptatt av heile biletet; at elevane skal få det beste tilbodet sportsleg, fagleg og sosialt. For å oppnå suksess på alle område, har dei lansert forslaget om å etablera ordning med fadderfamilie for kvar einskild elev det første året. – Ungdomane dreg frå det etablerte. Mor og far heime skal vera trygge og ungdomen må vera trygg og lika seg. Elles skal dei sjølvsagt vera heime, slår Hylen Solberg fast.