ToppVolley Norge:Uttakssamling på Sand

Denne helga var det uttakssamling for den nye nasjonale volleyballinja på Sand, ToppVolley Norge. Av totalt 70 søkarar vart 30 innkalla til samling, og 24 av desse får plass på skulen til hausten. Elevane som startar her, må villa satsa både på trening og skule, og det vil krev mykje meir av ungdommane enn dei som går på andre linjer. Det vil bli lagt opp til treningsøkter både om morgonen og om ettermiddagen kvar dag. I tillegg vil elevane trena tre gonger i løpet av veka i lag med idrettslaget på Sand. Prosjektleiar Hans Hylen Solberg ved Sauda vidaregåande skule fortel at det har vore ei vellukka helg. Alle dei 30 ungdommane kom hit og hadde med minst ein av foreldra. – Foreldra er viktige i denne samanhengen fordi dei må føla seg trygge på at ungdommane får eit bra tilbod, og at her er eit bra miljø, fortel Solberg. Lokale lag og organisasjonar har og vore på bana og presentert seg, og det kom det fram at bygda ventar i spenning fram mot hausten og ser fram til å ta i mot nye internatelevar. – Me har møtt velvilje hos fylkeskommunen som har sett moglegheitene her inne og tildelt ekstra opplæringsressursar til oss, fortel Solberg. Heile prosjektet er eit samarbeid mellom Noregs volleyballforbund, Sauda vidaregåande skule, Rogaland fylkeskommune og Statkraft, avsluttar Solberg. Idrett og utdanning har vore kopla i 20 år, men då berre mot allmennfag. Det unike tilbodet her på Sand gjeld alle studieretningar som Sauda vidaregåande skule har å tilby, alt i frå formgjevande fag til mekaniske. Dette blir det første nasjonale tilbodet i volleyball, og ungdom frå Troms i nord til Agder i sør har søkt på den nye linja. Tekst og foto: Bente Romsbotn