Løp gav meirsmak

Regnbyga som var annonsert klokka eleve på yr.no, fungerte nesten som eit startskot for løpet då ryttarane la ut på turen. Ordførar Torkel Myklebust var på plass i startområdet, men utan sykkel og tights. Det var lagt opp til to løyper, ei på om lag 3,5 mil og ei på om lag 4,5. Begge løypene gjekk frå Sand skule, ned forbi kommunehuset, gjennom Gata, og ut på vegen opp mot Suldalsosen. Der skilde løypene lag og returnerte. Underlaget for løpet var asfalt, grus og ”sti”. På det brattaste måtte nok syklistane rekna med å leia syklane. Hans Erik Svennes, ei av eldsjelene i sykkelklubben i Suldal, var godt nøgd med oppmøtet. Han håpa på 20-30 syklistar, og det vart om lag 25. Syklistane var mellom 10 og 79 år. Det ser ut som om interessa for å sykla løp i Suldal er stor. Klubben hadde ikkje annonsert ”løpet” i særleg grad, sidan dei ikkje formelt vart ein sykkelklubb før nå nyleg. Difor kunne ikkje søndagsturen kallast eit løp, og det var heller ikkje tidtaking eller plassering. I alle fall ikkje offisielt. Svennes hadde nemleg ein mistanke om at konkurranseinstinktet ville skina gjennom, både hos han sjølv og andre. Etter løpet hausta sykkelklubben skryt for arrangementet. Løypene var gode, med varierande terreng og vanskegrad, og etter løpet var det råd å bruka garderobane i Suldalshallen og å få seg ein matbit. Det einaste negative Svennes har fått høyra om, er manglande annonsering av arrangementet. Dette var bevisst frå klubben si side, på grunn av den manglande klubbstatusen, så det meiner han er til å leva med. Neste år? Når det gjeld løp til neste år, kan ikkje Svennes lova noko. Det er kostbart å laga eit løp med tidtaking, sidan dei må leiga inn folk og utstyr for å ta seg av den biten. I tillegg krev eit slikt arrangement ein del friviljug arbeid, så tankane er der, men det kan bli eit spørsmål om ressursar. Løype å sykla i skal ikkje vera noko problem, sidan dei nå har ei løype som har vist seg å duge. Denne løypa kan lett utvidast, eller ein kan ha andre trasséar, for Suldal er ein stor kommune med innbydande sykkelterreng fleire plassar. – Me skal vera ein klubb for heile kommunen, så det er viktig å ta alle bygdene i bruk.