Fartsglad

Sandsguten Per Jarle Smaamo er ingen reddhare når det gjeld fart og spenning. 28-åringen driv nemleg med roadracing, der han stiller i klassen Nasjonal i Norgescup. Nyleg reiste han heim frå løpshelg i Karlskoga, Sverige, med 3. og 4. plass i bagasjen. Ekstra kjekt var det å prestera sidan han aldri hadde kjørt på banen før. – Det var over all forventing. Eg er stornøgd med resultatet. Tredje plassen er som ein første plass for meg sidan dei to framføre meg var tidlegare A-førarar (elite), seier ein oppglødd Smaamo. Han fortel at det er ekstra kjekt å klatra så høgt på resultatlista når det er fleire kjørarar med som tidlegare har kjørt Norgesmeisterskap (NM), som ligg hakket over Nasjonal. Sjølv om Nasjonal er den mest populære klassen i Norge med flest deltakarar, er det ikkje kven som helst som får vera med. –Viss det er mange som har meldt seg på til ei løpshelg, er det berre dei 32 beste som får stilla til start, fortel han som ligg som nummer fem samanlagt. Målet hans er å vinna eit løp, men å prøva å gjera sporten til eit levebrød er ikkje aktuelt. – Eg vil berre ha det kjekt. Eg er for gammal til å satsa mot Europa. Det kostar dessutan mykje pengar. Les meir i papir-/pdf-utgåva