Reknskapen

Suldal er – heldigvis- eit mangslunge samfunn med forskjellige aktørar og ulike interesser. Utanfrå sett kanskje eit samfunn som er enkelt å definera i kraft av dei trekka som er så typiske for utkantkommunar som slit med folketalet og arbeidsplassane. Innanfrå er det nok ikkje alltid like lett å forstå seg som ein heilskap med altovergripande felles behov, for som overalt der det er menneske, står me også her i verdi-og interessekonfliktar og pågåande debattar om kva som best gagnar framtida. Målet om eit berekraftig samfunn kan me alle nikka til, men analysane om korleis me får det slik, kan variera. Godt er det; men uansett. Motoren i det heile er menneske med pågangsmot, kompetanse og lyst til få prosjekta sine til. Ingen kommunale fond eller velformulerte vedtak kan erstatta menneske som tenner på ein idé og set arbeidslysta inn på å få den realisert. Som tåler kvardagens med-og motvind og held fram, også når det buttar. Derfor er det flott å sjå tre høgst forskjellige aktørar som denne hausten står midt i prosjekt dei trur på med beina planta godt på jorda. Familien på Fattnes som nå har gjort heiltidsbønder av seg og investert i eit fjøs som har gitt dei ein kvardag med betre tid til både garden og familien. Den nye eigaren på Gullingen som energisk har kasta seg ut i ei drift som bør kunna hausta av dei nye utbyggingstidene på heia. Og sist; dei lokale firmaene som nå set i gang med det som er ein høgst etterlengta utbygging av husvære på Klypa på Sand. Tre gode nyhende. Dei tel og dei gjer ein skilnad.