Heilt prinsipielt

Sist periode hadde Senterpartiet formeleg bukta og begge endane i formannskapet, nå er dei redusert til to stemmer. Fram stig dei tidlegare små partia Venstre og Høgre med høgst prinsipielle meiningar som for månader sidan berre ville vore fotnotar i møteprotokollen. Men som nå blir ståande som grunngivinga til fleirtalsavgjerdene. Det er bra og på høg tid at kommunen gjennom sitt heileigde selskap Rygjatun Eigedom tar fatt i inntektssida av ei toppvolleysatsing som til nå har vore ivrigast på utgifts- og investeringssida. Med fjorårets forprosjekt for å få tankane på føter, burde det ha vore ei smal sak å få opp og fram søknaden i tide til å budsjettbehandla den på linje med andre gode kandidatar. Men så skjedde ikkje, underleg nok. Kva det kjem av, veit me ikkje, men når Senterpartiets representantar synest det hastar slik, er det meir enn rart at dei ikkje har sytt for å halda fast i saka. Uansett grunn, er Venstres instinkt heilt rett i den saka. Slik Høgre sitt er det i saka om næringsfondslånet til Marvik skog. Spesialbehandling og utanombudsjettlege snarvegar for kommunens toppvolleysatsing tener ikkje saka på sikt, snarare tvert om. Det er heller ingen gode grunnar til å balansera oppå regel-grensesteinane for næringsfondet, og aller minst rett før den tillyste gjennomgangen av utlånspraksisen. Så langt teiknar det nye året godt for ein politikkperiode der debatt og prinsipper ikkje blir festingrediensar, men kvardagsmat.