Eventyrleg

Men underet skjedde; i stadenfor nedlegging, blei det ikkje berre nytt liv, men utsikter til styrking og utviding for det lokale skattekontoret. Det er det næraste eventyret ein utkantkommune kan komma og må bli ei historie som får leva lenge, høgt i medvitet, lenge. For når sant skal seiast, var det vel flest som tenkte at kampen for skattekontoret ville bli symbolsk. Ikkje så rart, ordførarar og formannskap landet rundt er vel vane med å skriva brev og laga opprop som formeleg lyser av tap lenge før siste ord. Kva den kommunale innsatsen utgjer på skatteetaten si vekt, er det ikkje godt å seia. Det er heller ikkje nødvendig for å ta historia til inntekt for trua på at det kan nytta. Anten det er nedleggingstruga statsbedrifter eller det er tungbeden knoppskyting. Det er ikkje til å undrast over at folket i indre Ryfylke kan gå i frimodsunderskot eller bli kynikarar i duren frå sentraliseringskverna me lever med. Den største freistinga inst i fjorden er ikkje å slita på håpet, men å leggja det vekk.