Fondet

For den som slit med å hengja med, er altså synda til ordføraren at han har blanda seg inn i kommunestyret sin business. Det var kommunestyret som skulle bede om å få næringslivet sin uttale til kontrollutvalets rapport, ikkje ordføraren. I kommunestyremøtet tysdag kveld var kontrollutvalets leiar Sverre Underbakke klar på at kontrollutvalet er kommunestyrets reiskap og at ingen skal klemma seg inn mellom desse to. Det er fornuftig å trø forsiktig i omgang med formalitetane og svært fornuftig av ordføraren å innta horisontalen. Først og fremst fordi framtida vår fortener ein oppegåande og reflektert debatt om det som er sjølve kjernen i saka, nemleg korleis skal me bruka pengane me har fått som kompensasjon for kraftutbygginga i naturen vår. Det er ein debatt det må bli temperatur rundt, for sjølvsagt flyt utvikling og drift over i kvarandre. Definisjonane av kva som er kva er ikkje vitenskap, men nettopp det politikarar skal driva med; politikk. Det er sunt og bra med ein oppfrisking av prioriteringane, retninga og praksisen. Og gitt det nære forholdet som rår og skal rå mellom kommunestyret og kontrollutvalet, vil det også vera på sin plass med litt informasjon om kven som står bak rapporten som er premissgrunnlaget for den viktige debatten.