Håpar fleire vil spela i korps

Med truten mot munnstykket eller med trommestikker mellom fingrane. Når dei yngste i skulekorpset øver til konsert,er det med skikkeleg trøkk.

Søndag er det konsert med alle skulekorpsa i kommunen, og konsentrasjonen hjå musikantane står høgt i dagane før. Dei kan bli litt nervøse, innrømmer dei. Den yngre generasjonen trivst godt blant dei vaksne i skulekorpset. Men dei ser gjerne at fleire på deira alder har lyst å vera med i skulekorpset.

Høgdepunkt

Det kjekkaste musikantane veit er å reisa på tur. Eitt år er dei med og spelar på festival, neste året er det tur utan instrument. Den siste varianten er den kjekkaste, er dei yngste samde om. Når dei er heime, likar dei betre å halda konsertar. Berre det ikkje blir for mykje venting.

  – Det kan vera kjedelig å spela dei same songane under øving, seier Susanne Øygarden.

  – Og når me må stoppa midt i songen og heile tida starta på nytt, legg Andrea Bråtveit Sørestad til.

  – Men det er veldig kjekt, seier Tor Steine som er den einaste i Suldal skulekorps som spelar trommer. Han håpar det kjem ein til som har lyst å slå på slagverket.