Miljøvenleg skitspreiing

Kjell Hustveit leigar seg ut til å gjera skitarbeid for folk. Noko han synest er veldig kjekt. Spesielt når han også får gjera arbeidet mest muleg miljøvennleg.

Hustveit er både landbruksentreprenør, landbruksrådgjevar, bonde og rekneskapskonsulent og tek gjerne på seg skitarbeid. Men ikkje kva som helst. I tjue år har han nytta spreiar med slange direkte frå gjødselkjellar, dei siste ti åra også med såkalla stripespreiar. Dei siste fem åra har han også nytta tankbilar for å frakta husdyrgjødsel til grunneigarar som ikkje driv med husdyr, eller driv stort nok til å ha nok gjødsel. Sjølv om stripespreiaren kom på marknaden for mange år sidan, meiner Hustveit at metoden framleis er lite kjent for mange.

Nyttig investering

Med ein meir miljøvenleg metode blir det mindre traktorkjøring etter vegane. Hustveit har i staden inngått eit samarbeid med Vikedal Mur og Anlegg as, som har spesialdesigna tankar som transporterer store lass med husdyrgjødsel for bonden. Dei har óg kraftige pumper som kan pumpa gjødsla gjennom slangesystem. Stripespreiaren han nyttar bidreg til ei mykje meir miljøvennleg, effektiv og økonomisk gjødselhandtering. Hustveit trur at andre metodar der gjødsla blir spreia frå over bakkehøgde, kan komma til å bli forbode i framtida.

  – Ja, det går mot det. Det er så mykje ammoniakk som går til atmosfæra ved slik spreiing. Heile ni prosent av dei samla miljøforureiningane kjem frå landbruket, slik at det kjem til å bli ei innstramming for korleis ein spreiar skiten, meiner bonden.