Ingen tilbod i juli

I 2007 kunne barn og ungdom frå Suldal nyta aktive feriedagar på Kolbeinstveit der Rulturveka blei initiert av Ingrid Holmboe Høibo. Mange barnefamilier opplever juli som ein tøff kabal å løysa. Foto: Helga Møgedal

Av Marita Ims

Foreldre med småbarn har ei utfordring når juli månad står for døra og SFO held stengt. Likevel har ikkje kommunen planar om tiltak.  

Ingen klagar

Oppvekstsjef Kleppa er då Suldalsposten tar kontakt, ikkje klar over at SFO held stengt i juli. Etter å ha konferert litt med ein kollega, kan ho fortelja at det for 3-5 år sidan blei gjennomført ei spørjeundersøking i høve behov for SFO i sommarferien. Der kom det fram at det ikkje er behov for eit slikt tilbod. 

  Det har ikkje komme inn klagar i ettertid, seier Kleppa. Ho trur samstundes at det er familiar i kommunen som ville ha sett pris på eit sommartilbod, også i juli månad. 

  Men dette må i så fall komma frå dei det gjeld, seier Kleppa.

  Dersom det skulle visa seg at behovet er der, må dette vidare takast opp til politisk vurdering, seier Kleppa. 

Ingen tilrettelagt aktivitet

Fritidskonsulent ved kulturkontoret, Erik Walter Vold, har ikkje mottatt førespurnad om tilrettelagt aktivitet i sommar.  Basert på private erfaringar veit han godt at juli kan bli ein vrien kabal.

  Eg kan berre snakka for min egen familie: Juli månad er ei utfordring. Men me er heldige som har besteforeldre, eldre søsken blant barna som kan passa på dei minste, samt at me som foreldre tar ut fridagar kvar for oss. Så det ordnar seg alltid. Verre er det for dei som ikkje har familie her, eller dersom arbeidsplassen ikkje tillet at ein tar fri når ein sjølv ønskjer, seier Vold.