 |
Hovudsida
Kva skjer?
Aktuelt
Suldalsposten
Anna
|
|
Musikk og romantikk
Ane Foldøy, 25.06.08
Festivalgeneral Kjetil Nærheim og pressesjef Atle Ingar Vold inviterer til tre dagars storfest på Eriksmoen. Alt i morgon spelar E76 og D.D.E. opp til dans.
|
|
Ungkarsgeneral Kjetil Nærheim saman med pressetalsmann Atle Ingar Vold i det nybygde amfiet. Skulle det regna festivaldagane, så har dei sikra seg med 500 kvadratmeter tak over området.
|
I morgon startar årets høgdepunkt for mange, og festivalgeneral, Kjetil Nærheim, sparer ikkje på godorda når han fortel om musikken under ungkarsfestivalen.
– Me har alltid hatt bra musikk, men aldri så mykje bra som i år, seier Nærheim som har eit mål om å gi deltakarane musikk dei set pris på. Deltakarane får servert både trønderrock, country, irsk og 70-, 80- tals musikk.
I fjor prøvde dei ut ein tre dagars festival, noko som var svært vellukka. I år prøver dei igjen, og opnar storfesten med ”festivalgruppa”, E76, som er eit fast innslag på Eriksmoen kvart år. Same kvelden spelar også trønderane, DDE, som blir rekna som hovudtrekkplasteret også denne sommaren. Fredagskvelden byr Ove Støyl & Arly Karlsen og Åsmund Åmli Band på countrymusikk. FolkPort startar dansen på laurdag med visesong og balladar, og etter dei tek Ten Tons & Carina Dahl over. I puben vil TT-Band spela opp til countrymusikk kvar kveld.
Kåring av tøffaste ungkars-doning
Ungkarsfestivalen byr på tradisjonsrike aktivitetar som gjørmebryting, vassvolleyball, staurbering, tandemsekkehopping, kvinnfolkbering, tautrekking og rundballtrilling. Komikar Zahid Ali vil vera aktivt med i underhaldninga. Saman med arrangørane vil han kåra den tøffaste doningen laurdag ettermiddag. Dette året kan det altså svara seg å pynta litt ekstra på doningen. Fokus på vakthald
Pressesjef Atle Ingar Vold, som tidlegare har uttalt seg i media om standarden på vakthaldet, fortel om at dei kvart år har eit problem med mindreårige som snik seg inn på festivalområdet. Dette er noko dei vil slå ennå hardare ned på i år.
– Mindreårige blir sendt heim på forelda si rekning, forsikrar Vold, og legg til at folk som har laga bråk tidlegare år også vil bli sende heim. Eit innleidd vaktselskap frå Notodden skal syta for å gjera ungkarsfestivalen til ein trygg plass å vera. Romantikk i regnet?
Festivalgeneralen har det meste klart til festivalen. Det har mellom anna blitt lagt ned ein god del arbeid rundt uteområdet ved scena. Og skulle det komma regnbyger, har han også tenkt på dette.
– Me gjer det me kan for at deltakarane skal få nokre fantastiske dagar. Over 500 kvadratmeter med presenning skal strekkjast til tak over festivalområdet i tilfelle regn, seier ein optimistisk Nærheim. Med seg på laget har han rundt tre hundre dugnadsfolk frå heile kommunen som hjelper til på festivalen.
– Ungkarsfestivalen er først og fremst ein singelfestival for frie og franke av begge kjønn. Eriksmoen er ein unik møteplass. Den spesielle stemninga må berre opplevast. Dette må vera den beste opptakten til ein skikkeleg romantisk sommar, trur Kjetil Nærheim, som ser både ekteskap og sambuarskap som resultat etter ungkarsfestivalen kvart år.
« Tilbake
|
|
MEININGSMÅLING
|
Ingen aktive
|
|
