Gjort mykje skade
Bergøy fortel at dei er sikre på at det har vore jerv i distriktet. – Det er observert jerv i fleire omgangar, både i Sauda og nå sist i Suldal, og det er funne DNA etter to ulike dyr. Han meiner det byrja for to år sidan, men at alvoret i situasjonen ikkje gjekk opp for folk flest då. –Tap på sau i Sauda vart dyssa ned, hevdar han. I fjor hadde fleire sauebønder i Suldal tap på to-tre titals sauer, men Bergøy meiner alvoret i situasjonen først kom fram då jerven herja i området kring Nilsebu. Der vart det gitt erstatning for 180 lam. –Enkelte mista tredjeparten av lamma sine, nokre av desse vil slutta med sau, i allfall i heia, om dette gjentek seg. – Viltforvaltninga har sagt at det ikkje skal vera jerv i område der det er svært tett med husdyr. Det må ein kunna seia at det er i Rogaland. Bergøy forklarer at dette er grunnen til at det er gitt løyve til lisensjakt på 2 dyr, eitt i Sauda/Suldal og eitt som ikkje er avgrensa til eit særskilt område.

Krevjande sport
Bergøy er like glad det ikkje er jakta ennå, då isen er usikker i heia. Han viser til at det er farleg i høgfjellet på denne tida av året. Han er uroa for antydingane om at det er ei tispe i området. –Det er allereie to hannar som vandrar gjennom distriktet, det er lett å tenkja seg kva som kan skje om det er ei tispe der. Dette er ei uro han deler med Ola Jordebrekk i Suldal Sau og geit. –Det kan vera 5-6 jerveungar i området viss jerven har para seg, fryktar Jordebrekk, som òg trur jerven kan koma attende for å grava opp lageret etter i sommar. – Dei kan grava seg ned 2-3 meter for å finna kjøt.

Har løyva i orden
I tillegg til løyvet på lisensjakta, som varer til 15.februar, er det viktig at grunneigarane gir løyve til jakt på eigedomane sine. Bergøy fortel at det er annonsert i lokalpressa, men ingen grunneigarar har sett seg imot jakt på sine områder. Nå håper Bergøy at folk er raske til å melda frå om dei ser far etter jerven. Då vil jaktlaget setja i gang så snart som råd.