Saksbehandlar Rune Roalkvam og bygdeutviklingssjef Endre Gjil vil ikkje ta skulda for at Osberg-utbetringa er blitt forsinka.

Vonar på lærdom
Men eks-rådmann Korsvoll går på Forum Suldal endå lenger og utropar den til ein ”planleggingsskandale”. Korsvoll karakteriserer Statens vegvesen sin innsats som ”slett arbeid”, men har inga trøyst til kommunen. Tvert om peikar den erfarne administratoren på at det, ifølgje lova, er kommunen sitt ansvar å sjå til at planarbeidet er fullstendig og utan lause trådar. Og konkluderer med at spørsmåla som har forseinka framdrifta av prosjektet burde vore avklarte i reguleringsprosessen. Men til gjengjeld rosar eks-rådmannen ordføraren sin innsats for å bøta på skandalen og avsluttar med å vona at kommunen har trekt lærdom til neste store korsveg, Sandsfjordbrua.

Bygdeutviklingssjef Endre Gjil og saksbehandlar Rune Roalkvam konstaterer at reguleringsplanen for Osberg blei vedtatt i 2007, då Korsvoll framleis var rådmann. Då låg det inne eit sjødeponi for overskotsmassar, men kommunen bad Statens vegvesen finna alternativ bruk av massane ut frå innspel som kom i høyringsrunden.
Seinare gjorde tekniske krav internt i vegvesenet at massemengda langt oversteig det som det var sett av plass til i planen.

Ligg på vegvesenet
– Ingen her kunne føresjå at overskotsmassen ville bli større, eller overprøva vegvesenets vurderingar. Forseinkingane ligg heilt og full på vegvesenet og deira prosjektering. Når dei varsla nye omreguleringsprosessar, har me tvert om kasta oss rundt og mast på Fylkesmannen, konstaterer Gjil som også undrar seg over at det skal finnast læringspotensiale for Sandsfjordbrua i Osberg-saka. – Brua er ferdig regulert, og det er ingenting som tilseier at det skal komma opp nye moment der, meiner bygdeutviklingssjefen.