Sverre Songe Paulsen og Vegard Vandvik er glade for å kunna invitera til eit flott operahus og operaoppsetjing i Oslo. – Mange vil truleg kjenna att bassen Magne Fremmerlid frå Johannespasjonen i Suldal, trur Vandvik.

Ønskjer alle velkomne
Operaturen er resultatet av eit samarbeid mellom Sand pensjonistlag og kulturkontora i Sauda og Suldal kommunar. Men både Vandvik og Songe Paulsen understrekar at dette ikkje er meint å vera ein pensjonisttur. Sistnemnde såg eit tv-innslag der operaen Carmen vart vist på storskjerm på operataket for 5000 mann. – Dette må me òg sjå, tenkte han og kontakta Vandvik. Nå har arrangørane sikra seg 48 billettar til «Jorda rundt på 80 dagar», som opphavleg var tenkt å vera opningsoperaen i Bjørvika. Slik gjekk det ikkje, men Vandvik reknar med at operaen med den bakgrunnen er svært flott.

Frå dør til dør
Bussen går frå Sauda og austover gjennom Suldal, så dei som bur langs ruta til Nesflaten kan gå på bussen mest frå døra heime. Opplegget tilbyr både mat og overnatting, og arrangørane lovar ei omvising i operaen for dei som ønskjer det, før framsyninga laurdag føremiddag. Operaturen varer frå fredag føremiddag til søndag, men sjølve framsyninga er på laurdagen. I tillegg freistar dei med eit festmåltid i operaen.
        For dei som lurer på kva ein kler seg i under ei operaframsyning, kan både Vanvik og Songe Paulsen avklara at ein ikkje treng å vera stivpynta. – Men heller ikkje slitne olabukser. Vanlege, fine klede er meir enn godt nok, seier Songe Paulsen. Om alle billettane vert selde, er ein buss fylt opp. Men det er førstemann til mølla, eller billettane, som gjeld, ifølgje arrangørane.