 |
Hovudsida
Kva skjer?
Aktuelt
Suldalsposten
Anna
|
|
Tronge tider for hjorten
Tomas Finnvik, 06.02.10
Mykje snø og sterk kulde har gjort livet vanskeleg for hjorten. I Imsland la ein merke til at ein stad ved riksvegen mellom mellom Kvaløy og Ølmedal stod det jamt hjortar under nokre grantre. Dyra såg medtekne ut, spesielt kalvane.
Mange som for framom hadde vondt av hjortane som såg så forkomne ut, og meinte at ein burde setja i gang og fôra dei. Ein prøvde først med litt høy og silofôr. Det viste seg at det var silofôret som fall best i smak. Nå har dei ei tid fått heile rundballar, og på 3-4 dagar greier dei å setja til livs ein balle på 6-700 kilo. Men så er dei òg mange om det. Talet kjenner ein ikkje, men det er sett om lag 15 dyr samstundes, og det er tydleg at det er fleire bordsetjingar.
Det har kome ”bekymringsmeldingar” frå folk som har fare forbi.Ein var redd for at det kunne bli mykje hjort på vegen, når fôringsplassen låg så nær. Men det har ikkje slått til. Plassen ligg på oppsida av vegen, og dyra trekkjer ned frå lia ovanfor. Når dei er forsynte, fer dei tilbake til kvileplassane sine i granfeltet lenger oppe.
Leiaren i Viltnemnda i Vindafjord, Erling Lien, var på plass i førre veke. Han meinte at staden var lagleg, og at å fôra hjorten var eit svært godt tiltak i denne harde vinteren. Han fortalde også at det kunne bli gitt tilskot frå Viltfondet til slik fôring, som nå er i gang mange stader i kommunen.
« Tilbake
|
|
MEININGSMÅLING
|
Ingen aktive
|
|
