 |
Hovudsida
Kva skjer?
Aktuelt
Suldalsposten
Anna
|
|
Visste ikkje om odelsrett
Gro Helland, 10.03.10
Bjørn Erik Nerheim og kona Laila Holthe kjøpte ein gard dei trudde det ikkje var odel på. Men ved kjøpet trådde odelen inn att, og nå mister truleg paret garden.
|
|
Huset var ikkje til å bu i då familien kjøpte garden. Derfor har dei pussa opp heile våningshuset dei siste to åra. Om dei får avslag i prisen på garden for dette arbeidet er det takstmannen som bestemmer. Foto: Kjersti Eikemo
|
Ekteparet kjøpte i fjor ein gard på Gauttun på Nesflaten. Odelen som var på garden fall, ifølgje Nerheim, bort då den førre eigaren kjøpte garden. Med Holthe og Nerheim sitt kjøp av garden i 2009 trådde odelsretten i kraft att. Men det visste ikkje paret om. Dei kjøpte garden privat og gjorde etter det dei kan sjå, så mykje dei kunne for å finna ut om det var odel på garden.
– Me snakka med gamle folk på Nesflaten og ingen kjente til at det kunne vera nokon som hadde rett på odel, seier Nerheim.
Men tett opptil fristen gjekk ut, i slutten av februar dette året, kom det krav om odel på garden. Og sjølv om ingenting er avgjort ennå, ser det ikkje ut til å vera tvil om at den andre parten har odelsrett, ifølgje dei nye eigarane.Mykje å avklara
Odelsretten Vidar Guggedal krev på garden på Gauttun, har han etter bestemor si. Guggedal meiner odelslova er god slik den er nå.
Den aktuelle garden vart kjøpt før innløysingsfristen vart korta inn til seks månadar frå kjøpet vart tinglyst, og dermed hadde han eitt år på seg til å ta stilling til om han ville ta garden på odel.
– Om det er eitt år eller eit halvt år er det greitt. Men det må heilt klart ikkje bli kortare enn det er i dag, då det er mykje som må avklarast i ei odelssak. Både den odelsberettiga og den som kjøper garden må halda seg til dei fristar og rettar som gjeld, seier han. Eit halvt år er bra
Arna Høyland i Rogaland Bondelag meiner at odelslova på mange måtar er grei å ha og meiner innskjerpingane som vart gjort i fjor sommar er viktige. Bondelaget vil ikkje arbeida for å endra lova ytterlegare nå, eller å avskaffa lova. Det er å gå for langt, forklarer Høyland. Men ho ser at det er grunn til å stilla spørsmål om lova fungerer etter intensjonen når det gjeld dei som ønskjer å komma inn i landbruket.
Seljar må opplysa
– Det høyrer med til seljaren si generelle opplysingsplikt å gjera greie for eventuelle odelsrettar på ein gard, anten det er sal mellom private eller gjennom meklar, seier rådgjevar hjå Fylkesmannen, Kirsten Smedvig. – Det er nokså allment kjent at ein kan risikera å tapa pengar ved å kjøpa gard med odelsrett, det er ikkje noko nytt regelverk her.
« Tilbake
|
|
MEININGSMÅLING
|
Ingen aktive
|
|
