 |
Hovudsida
Kva skjer?
Aktuelt
Suldalsposten
Anna
|
|
Meir regn
Nils Hallvard Korsvoll, 21.07.10
Med store nedbørsmengder i helga, og meir i vente, ser det ut for at juli blir våtare enn dei føregåande månadane.
|
|
Jon Vetrhus undersøkjer kor mykje regnvatn den 115 år gamle vêrstasjonen på Vetrhus har samla opp til nå i juli. (Foto: Kjersti Eikemo)
|
Akkurat som vinteren, har òg sommaren 2010 til nå vore tørr. Jon Vetrhus, som driv målestasjonen på Vetrhus, registrerte berre 36,7 mm nedbør i heile juni, og ikkje mykje meir i mai. Mannen, som driv vêrstasjonen som vore i bruk sidan 1895, trur likevel ikkje det har vore ein kritisk situasjon for jordbruket, men meiner det heller er kraftprodusentar som har sett mørkt på tørrvêret.
Torger Hauge står for målingane på Sand, noko han har gjort i 25 år nå, og sjølv om Sand gjerne får meir regn enn det kjem lengre opp i dalen, så er det ikkje store mengder som har komme der heller. I mai bokførte Hauge 56 mm nedbør og i juni berre 48 mm. Men heller ikkje han trur jordbruket har lidd noko særleg av dette.
Det har vore tørt i Sauda òg, og den offisielle statistikken frå yr.no syner at det berre var 49 og 34 mm regn desse to månadane, mot normalsnittet på 100 og 117 mm.Juli-nedbør
Men natt til søndag opplevde Sand eit ordentleg regnskyll, og Hauge kunne registrera at det var komme nye 21,3 mm med regn. På Vetrhus var mengdene ikkje like store, han målte 11 mm, men mest regn hadde dei der natt til den 13. juli då det kom 18,7 mm.
Vetrhus tykkjer ikkje nedbørsmengdene har vore store i juli heller, men at det har komme regn jamt og trutt. Men vêrvarslet framover, i alle fall på kort sikt, tyder på at det er meir regn i vente, så kan hende juli til slutt kjem opp mot normalen.
« Tilbake
|
|
MEININGSMÅLING
|
Ingen aktive
|
|
