Kva skjer på Ryfylkedagane?
Festivalsjef Maren Landsnes og Marit Larsen i Suldal Vekst presenterer i dag eit program dei håper og trur vil gleda publikum.
På kveldstid blir det god sjanse til å få gang på dansefoten, og på dagtid lovar dei varierte opplevingar for alle. Ryfylkedagane fell i år saman med pinsehelga.
Rock og country på dialekt
Dei lokale heltane i Trave, startar musikk-helga fredagskvelden før det populære telemarksbandet Hardhaus entrar teltet. Larsen lover rock og country på dialekt og garanterer høg stemning.
– Me gjorde avtale med Hardhaus allereie i fjor, dette gler me oss til! Gruppa slepper ny singel i morgon, så nå er det berre å lytta seg opp, rår ho.
Bluesband
Laurdagskvelden skal det også svinga godt i teltet.
– Det blir som ein liten blues- og rockefestival, smiler festivalsjef Landsnes lurt.
Reodors Bluesrockers frå Sand startar kvelden og set stemninga, før Eric Slim Zahl med band skal få fart på suldølen. Slim Zahl som er frå Stavanger vann EM i blues i 2016 og turnerer både her heime og utanlands med musikken sin.
– Om ettermiddagen kjem me sikkert til å laga vorsj med mat i teltet, før det brakar laus, smiler festival-damene og røper at konsertbillettane blir lagde ut for sal i morgon, fredag.
Pirat-pappa
Det er ikkje berre i teltet at spennande namn dukkar opp. På Hydrokaien parkerer Pirat-pappa skuta si og inviterer barn til piratshow, skattejakt, hoppeslott, ansiktsmåling og sjølvsagt ei omvising i skuta.
Elles blir det liv og røre i heile sentrum, etter god oppskrift frå tidlegare år.
– Det blir fleire ulike utstillingar, Bo Gaustad opnar si sommar-utstilling på Kulturhuset og sogelaget byr også på ny utstilling, røpar festival-leiinga.
– For dei som ikkje vil på utstilling, kjem det til å handla om bil, båt og motor i Sørenden. Og for at folk skal få litt betre tid til å få med seg alt, har me utsett andaløpet ein halv time i år.
Suldal rundt
Forutan grilldag på Nesflaten om søndagen, blir det konsert og musikkgudsteneste i Jelsa kyrkje pinsedagen. Her er det Martin Nygård Haug og Kristin Kleppa med musikalske venner som står for musikken.
I Erfjord blir det familietur til Kammen om søndagen. Ungdomsarrangementet som vanlegvis er om fredagen, har ungdomsrådet valt å utsetja til seinare.
Larsen og Landsnes seier at dette berre er smakebitar av alt som kjem til å skje i løpet av pinsehelga. Det er framleis råd å leiga seg stand-plass om nokon ønskjer det.
– Eg må få lov å rosa suldølen for ein imponerande dugnadsvilje, skyt den ferske festival-leiaren inn og inviterer samtidig frivillige som har lyst å gjera ein innsats til å ta kontakt.
– Me tar godt imot alle som vil vera med å hjelpa!
