Sterke prestasjonar og god laginnsats i Kollen
Under helgas Ungdommens Holmenkollrenn, som samla om lag 800 tretten- og fjortenåringar, gjorde suldalsløparane svært gode løp.
Skirennet blir rekna som eit uoffisielt NM for denne aldersgruppa og deltakarane kjem frå heile landet. Det er stor stas å få gå skirenn i Norges nasjonalanlegg der ein får kjenna mjølkesyra i «Helnerbakken» og kjøra dobbeldans over «Northugflata» mot mål.
Fem unge løparar
Laurdagen baud på den velkjende kollenskodda med godt klisterføre og klassisk stil, mens det på søndagen klarna opp til ein strålande dag med skarpt føre for fristil.
I kvar klasse er det om lag 200 løparar å knivast med, og alle gjekk 3 km distanse i det flotte anlegget. Nivået er rimeleg høgt, beste tid i G-14-klassen var 6,31 minutt på søndagens 3 kilometer fristil!
Dette året var Suldal representert med Tobias Lunde, Thomas Bakka, Mathea Vik, Ella Tjøstheim og Nora Nerheim, alle i 13- årsklassen og dei kan også vera med neste år. Alle fekk ut sitt potensiale, som resulterte i svært gode prestasjonar og fleire topplasseringar.
Sterke prestasjonar
Thomas Bakka leverte to knallgode løp i norgestoppen med å bli nummer 14 og 13 desse dagane. Tobias Lunde gjekk godt og vart nummer 101 og 105 i same klasse, godt innanfor 50 prosent-premieringa.
Ella Tjøstheim vart nummer 35 på klassisk og knalla til med ein fantastisk 7.plass, to sekund frå pallen på fristilløpet. Mathea Vik leverte to jamt sterke løp blant topp 30 med å bli nummer 29 og 25. Nora Nerheim gjorde også gode løp, der det er tett mellom løparane vart ho nummer 70 og 78 i det sterke selskapet med dei 161 startande.
Fjerde beste jentelag
I lagkonkurransen i jenteklassen scora Suldal 108 poeng, noko som førte til at Suldal vart 4. beste klubb i J13. Det var berre Lyn IL , Heming IL og Nittedal IL som hadde fleire poeng enn våre jenter.
Alt i alt ei flott helg for både utøvarar og støtteapparatet, som alle hadde ein fin tur.
Tekst og foto: Stig Morten Nerheim/Suldal idrettslag
