Tysdag 22. september runda Terje Arnfinn Murberg 80 år. Han sparka småstein i Bjarkøy kommune, eit bonde- og fiskarsamfunn der den nordnorske høvdingen Tore Hund hadde sitt sete. Han flytte tidleg til Austlandet og Oslo kor ei lang utdanningsreise tok til takka vera husrom hjå onkel og tante på Oppsal. Etter nokre omvegar gjennom studieløpet, blei det utdanning ved NTNU i Trondheim med doktorgrad i adferdsmedisin i 1999. I 2004 blei han professor i helsepsykologi ved Det helsevitenskapelige fakultet på Universitetet i Stavanger. Han forska mykje på helse, livskvalitet, sosial støtte og læringsmiljø i skulen, mellom anna saman med professor Edvin Bru. I 2008 fann dei gjennom sitt arbeid at eit godt forhold til læraren er til stor hjelp for elevar med depresjonar, og kan vera heilt avgjerande for koss elevane presterer på skulen og på heimebane. Eit tema som er like aktuelt i dagens ordskifte. I 2016 var arbeidsdagen slutt og to andre lidenskapar fekk bløma heile døgnet og alle dagar i veka. Hundar og fysisk fostring. Murberg har vore og er lidenskapleg oppteken av sine engelske settere og alt som kan halda han i god fysisk form, enten det er sykling, romaskin eller å springe i skog og mark. Er han ikkje på Mariero finn du han i Vatlandsvåg i Suldal saman med kona si gjennom meir enn 50 år; Kjersti Schibevaag. Saman har dei to søner, Erlend og Torgeir Schibevaag og tre barnebarn.
Terje Arnfinn Murberg 80 år
