– Bom chicka, bom chicka, bom...
Salsaen spreier seg i bedehusrommet. Babyane flirer og sprellar med føtene sine høgt til vêrs. Dei er på babysong.
Denne saka stod på trykk 25. november 2006
Dei bittesmå kravlar rundt på mjuke, flate madrasser. Det er akkurat passe varmt i rommet. Mødrene sit i ring rundt jentene og gutane sine, og passar på. Snart skal dei begynna å syngja.
Artikkelen held fram under annonsen.
– "Hei alle samen og velkommen her i dag. Synge dokke samen med meg, blir det kjempebra. Tralalalala...Tralalalala", syng mødrene, og lear med babyane som dei nettopp har henta opp i fanga sine.
Fort rir dei. Og ror. Det kiler når mor bakar lita kringlekake på babymagen.
– "Bake, bake liten kake. Rulle, rulle liten bolle. Ringle, ringle liten kringle. Og visj inn i ovnen". Dei elskar dette, og skrattler.
Babyane blir sleppte ned på madrassene igjen. Fritt. Desse mobile kroppane som alle nærmar seg året, kravlar rundt og grabbar til seg instrumenter. Smakar på dei, og rister på dei.
Rakel Underbakke ser alvorleg på dei andre, og på songheftet sitt. Bit litt i det. Kamilla Tednes Jårvik bit også. I rangla si. Mathias Melby Vold er einaste guten i dag. Han ordnar opp med stilla, og rister på instrumenta han finn.
Brått spreier salsaen seg i bedehussalen på Sand. Babyane blir fanga opp frå golvet, og si eiga verd.
– "Bom chicka, bom chicka bok, bom, bom. Åååååh. Oiiiiiiiiih!" syng alle. Mathias får bruk for rytmen sin, og rister heilt i takt med dei latinamerikanske tonane.
Dei nusselege lèt seg totalt riva med i musikken, før stilla hentar dei inn igjen.
Artikkelen held fram under annonsen.
Tekst og foto: Annette Berge Espe