Fire utstillingsopningar på laurdag

Ikkje mindre enn fire utstillingar opnar denne føremiddagen. 

Mimrestova, Kulturhuset og Sjøhuset

Sogelaget opnar fotoutstillinga Strandstaden i endring på Mimrestova, og Suldal Kunstlag opnar sommarutstillinga på Kulturhuset med Valdar Nyvoll. Sjøhuset byr på kunst i to etasjar, oppe stiller Nenad og venner ut, nede i 1. etasje opnar Målarklubben si sommarutstilling.

Nenad med venner

Til sommarens utstilling har Nenad Ignjatic fått med seg tre venner. Sjølv skal han stilla ut tolv nye, originale pastellar i blanda teknikk. Til saman trur han utstillinga vil romma meir enn 40 bilde. Torbjørn Erdal frå Bergen kjem til Sjøhuset med ein stor variasjon av teknikkar, både grafitt, pastell, akvarell, tusj, olje og akryl. 

– I verdsklasse

Svitlana Yalovets, for somme kjent for sine illustrasjonar i Suldalsposten, får også vist seg fram i lag med dei tre andre. 

– Ho leverer arbeid i verdsklasse, meiner Ignjatic og er heilt sikker på at Yalovets blir ein illustratør å rekna med for framtida.

Fjerde utstillar er Yevheniia Nakonecha, også ho frå Ukraina, med bakgrunn frå kunstkonservatoriet i Ukraina.

Nerdrum-eleven Nyvoll

Meir kunst blir det når kunstlaget inviterer til opning med Valdar Nyvoll. Han målar i sommarhuset sitt på Jelsa og har tidlegare hatt eit opphald hos Odd Nerdrum, som nok har sett sine spor. Til sommarutstillinga på sporet av den tapte tid, som også er ei salsutstilling, har han med seg måleri og teikningar.

Strandstaden Sand i endring

I Mimrestova til sogelaget blir det også i år gamle skattar i glas og ramme å studera. Temaet for sommarutstillinga er Sand i åra 1866 til 2025, og til opninga kjem historikar og bygdebokskrivar Ernst Berge Drange for å fortelja om utviklinga. 

– Det har sjølvsagt teke lang tid å velja ut dei 60 bilda og å finna rett dokumentasjon. Men dette er eit lystprega arbeid, så då går det fint, smiler Terje Bråtveit i Suldal Sogelag, som nå gler seg til laurdag og ei full mimrestove.