Vebjørn Selbekk seier han har opplevd sitt livs eventyr på Farmen Kjendis. Foto: Alex Iversen / TV 2

Kristenkonservative Vebjørn Selbekk fann tonen blant kjendisane på Farmen

Me er vane med å høyra Vebjørn Selbekk på Dagsnytt 18 eller på Dagsrevyen. Men etter deltakinga i Farmen har han figurert på framsida av Se og Hør og andre kjendismedia. Den kristne rikssynsaren elskar sitt nye liv som kjendis og har fått eit heilt nytt syn på andre kjendisar etter Farmen.

Den nåverande redaktøren av Dagen blei rikskjent då han i 2006, som redaktør av det kristne bladet Magazinet, publiserte dei omstridde Muhammed-karikaturane. Etter det har han vore fast talsperson når ytringsfridom eller kristenrelaterte saker skal diskuterast i media.

Sitt livs eventyr

Redaktøren nøler ikkje med å kalla dei seks vekene på Farmen for sitt livs eventyr.

Artikkelen held fram under annonsen.

– Eg likte meg frå første dag og har blitt kjent med så mange forskjellige menneske der inne på garden. Ikkje minst har eg blitt kjent med menneske som har eit heilt anna verdisyn enn meg, men eg har likevel fått meg venner for livet, seier Selbekk.

– Men korleis blir det å leve så tett på folk som både bannar og drikk og lever heilt annleis enn deg?

Selbekk ler av spørsmålet og meiner det har gått overraskande bra.

– Eg er van med å vera saman med alle slags folk privat, så for meg var det ikkje noka overrasking at dette skulle gå bra. Men eg trur det var meir overraskande for dei andre at dei faktisk skulle like ein kristenkonservativ mann som meg, seier han.

Lærte bort fadervår

Redaktøren fekk seg likevel nokre overraskingar inne på garden.

– Eg såg for meg at Dorthe Skappel skulle komma inn der med høghæla skor, men så viser det seg at ho er ein veldig jordnær person som i tillegg er god på gardsarbeid. Bloggaren Sophie Elise viser seg også å vera eit utruleg reflektert og analytisk menneske. Det hadde eg ikkje trudd på førehand.

– Men kva tykkjer så lesarane av den konservative avisa Dagen om dei nye venene dine?

– Tilbakemeldingane har utelukkande vore positive, og mange gler seg over at eg blant anna har lært ein av Norges største kjendisar, nemleg Sophie Elise, å be fadervår. Det er eg faktisk litt stolt over sjølv også, seier Selbekk.

Artikkelen held fram under annonsen.

Vebjørn Selbekk blei god ven med Sophie Elise Isachsen. Foto Alex Iversen / TV 2

Er fan av Støre

Statsminister Jonas Gahr Støre var utanriksminister under karikaturstriden som gjorde Selbekk kjend i 2006. Han gjekk hardt ut mot Selbekk i staden for å gi han støtte. Det er derfor overraskande at Selbekk i dag seier han er med i fanklubben til Støre og at han har stor sans for Støre som politikar.

– Eg har stor sans for ein privilegert mann som Støre som står på og jobbar for folk som er langt under han i klasse. Likevel meiner eg at det var totalt uakseptabelt det han gjorde i 2006. Det var ingen andre utanriksministrar som var i nærleiken å svikta ytringsfridomen slik han gjorde. Han dolka meg i ryggen og let meg henge ute til tørk. Slik følte eg det den gangen og slik føler eg det nå, seier Selbekk.

Redaktøren i Dagen har lenge sakna at Støre hadde teke eit oppgjer med det han sa den gangen, men ber ikkje nag til statsministeren av den grunn.

– Han burde ha handla annleis, og han burde i alle fall ha tatt eit oppgjer med dette nå når han er blitt statsminister. Men utover det synest eg at Støre er ein fin fyr.

Brenn for ytringsfridomen

Sjølv om Selbekk nå er blitt reality-kjendis har han ikkje lagt bort kampen for ytringsfridomen. Han er medlem av Ytringsfridomskommisjonen og synest Norge som land skal ha vide grenser for ytringsfridomen.

Han stiller gladeleg opp for å forsvara retten til å ytra seg sjølv om dei som ytrar seg har eit heilt anna syn på samfunnet enn det han har sjølv. For eksempel støtta han den terrordømde islamisten Ubaydullah Hussain sin rett til å hylla eit terroråtak.

– Rein oppfordring til vald er uakseptabelt, men religiøs hyllest til utført terror meiner eg er innanfor og noko me må akseptera. Det betyr sjølvsagt ikkje at me støttar dette synet, men me må rett og slett tole at folk ytrar seg.

Redaktøren i Dagen fann raskt tonen med samfunnsdebattant og komikar Shabana Rehman. Foto Alex Iversen / TV 2

Håpar han ville ha vore like modig i dag

Redaktøren har betalt ein høg pris for sin kamp for ytringsfridomen. Då det storma som verst i 2006, blei både han og familien sterkt råka og måtte ha politivern og bu på hemmeleg adresse. Han blir i tvil når spørsmålet kjem om det var verdt det og om han ville gjort det igjen.

Artikkelen held fram under annonsen.

– Det er eit spørsmål som det nesten er umogleg å svara på. For min eigen del kunne eg ha gjort det igjen, men når du har familie og barn blir det straks mykje vanskelegare å forsvare. Men eg håpar verkeleg eg ville ha valt å gjera det igjen. I den augneblinken me inviterer terroristar inn i det redaksjonelle rommet og lar dei ta avgjerdene om me skal publisere, så har me tapt som samfunn. Så eg håpar verkeleg eg hadde vore like modig i dag.

Spørsmålet om han vil sei ja til å delta på endå fleire reality-program, er langt enklare å svara på. Redaktøren kan på ingen måte sjå bort frå at han vil dukke opp i eit anna show på fjernsynet.

– Eg må nok vedgå at eg likar all merksemda eg har fått og at eg er litt PR-kåt. Men det blir uansett ikkje med noko som har med dansing å gjera, det kan eg nesten garantera, avsluttar Vebjørn Selbekk.

(©NPK)