Mann av huse på Veka-basar

Laurdag var dagen for ein god, gamaldags basar på Suldal Samfunnshus. At dagens Veka-kvinner har blese liv i ein gamal tradisjon såg suldølen ut til å setja dualeg pris på.

Anslaget seier at minst 250 gjester frå fjern og nær fann vegen til Veka-basaren slik at sjukehusklovnen kunne reisa heim med svimlande 100 000 klingande myntar i lomma!

Vippsen gjekk varm

Drøset går lett mellom generasjonar og grender medan lukta av heimebakst og nykoka kaffi blandar seg med såpeboblane frå sjukehusklovnen Konstantisola (Torunn Iren Fisketjøn). Køane er lange og vippsen går seg varm etter kvart som loddbok på loddbok blir utskriven. Trass i at det skramlar og let i kott og krør i jakta på fleire stolar og bord, er humøret på topp og stemninga like så der gjestane stimlar seg inn i samfunnshussalen.

Variert underhaldning

Helge Bakka tek oss humoristisk med på ei reis bakover i møtereferata frå foreininga som starta i 1912, og som fram til nå har lege brakk sidan 2002. Bakka blir avløyst av sangglade barn i koret Barnerøyster, før suldalskvinna Torunn Iren Fisketjøn, denne gong utan klovnenase, fortel om arbeidskvardagen som spilloppmakar mellom sjukdom og alvor.

Reseptfri medisin

-Å få le og tøysa midt i alt det vonde, er ei reseptfri medisin som får store og små til å sleppa ned akslane og puste, seier Fisketjøn, før ho tek oss med inn på rommet til den sjuke guten som på eit blunk blei birren og ein viktig alliert i ein heftig vannpistol-krig. Ho er svært takksam for at inntektene frå basaren går til organisasjonen hennar Sykehusklovnene.

Sterk historie

Den aller sterkaste historia er det Marit Fisketjøn Høie som står for. Ho fortel kor avgjerande møta med klovnar og humor var for henne og familien då den tredje og yngste sonen blei råka av leukemi berre fem månadar gamal.

– Store og små fekk oppleva å skratta og le midt i alvoret på sjukehuset, fortel ho. Knapt eit tørt blikk er å augna i salen då den modige kvinna fortel frå scenekanten medan det kvitrar livleg i kroken der storfamilien sit saman med dei tre heilt friske barna hennar.

Dans og song og ein rørt Veka-gjeng

Vidare fekk me vera med inn i danseuniverset til ungdomen Angelica Kaltveit Eike før ein syngande Nils Bjarne Vold rundar programmet av med historieforteljing saman med Kristin Sandvik på piano. Kanner og fat får kontinuerleg påfyll slik at det er lett å vera gjest denne ettermiddagen, før den store finalen. Gevinst på gevinst, alt donert av lokalbefolkninga, samt familie, vener og kjende, fann vegen rundt via ivrige barnehender, og då siste vinnar er kåra er det ein godt nøgd gjeng som tuslar seg heim under ein vinterhimmel i brann. Dagen derpå er Veka-gjengen både rørte og øvegidde over oppmøtet, dugnadsanda og ikkje minst gåvmildheita.

– Neste gong må me vurdera å leiga både foajé og gymsal i tillegg, seier dei.