Pastasalat med scampi er ei smakfull alt-i-eitt-gryte. Foto: Marta-Brit Lunde

Påskekvess

Fridagar i påska betyr ofte god mat. Me har dykka ned i arkivet og funne fram fire favorittoppskrifter.

Pastasalat med scampi

Det er ferietid, og kva passar vel betre enn ei enkel alt-i-eitt- gryte som det tar under ein halvtime å laga Denne retten har knasande asparges og smakfulle scampi i seg. Om ein heller vil bytta scampi med kylling, går nok det heilt fint. Oppskrifta gir 6-8 porsjonar.

Ingrediensane ein treng til pastasalaten. Foto: Marta-Brit Lunde

Dette treng du:

2 chili

4 fedd kvitløk 1 gul løk

litt olivenolje

1 raud paprika

1 boks minitomatar

1 pakke fersk asparges

1 pose fersk spinat

5-6 dl fløyte

Artikkelen held fram under annonsen.

500 gram scampi (eller ei blanding med scampi og laks, eller annan fisk)

500 gram pasta (sorten linguini er fin å bruka)

1 egg

1 pakke parmesan

salt

pepar

Slik gjer du:

Dette er ein stor porsjon, så ei stor panne er fin å bruka. Har du kjøpt frosen scampi og fisk, så hugs å la desse tina i kjøleskap natta over og så få renna godt av i ein sil.

Start med å klargjera det meste før du set på panna. Finhakk chili og kvitløk, den gule løken kan skjerast i større bitar om ein vil. Legg dette i ei skål.

Kutt paprika i passe bitar, del tomatane i to og del aspargesen i tre, dei to nedste delane skal også delast på langs.

Artikkelen held fram under annonsen.

Sett på pastavatnet.

Surr så chili, kvitløk og løk blankt i ei panne i lag med litt olivenolje. Ta det ut av panna og gjer det same med paprika, minitomatar og asparges. Foto: Marta-Brit Lunde

Surr så chili, kvitløk og løk blankt i ei panne i lag med litt olivenolje. Ta det ut av panna og gjer det same med paprika, minitomatar og asparges. Medan pastaen kokar minutta den skal, legg spinat i steikepanna og hell på cirka tre dl av fløyten. Dryss på litt salt og pepar. Legg så i scampi og eventuelt laksebitar. Medan dette putrar, siler du pastaen og legg den tilbake i gryta. Viss det er plass i panna, ha så dei andre grønsakene i.

Pastasalat med scampi snart klar for servering. Foto: Marta-Brit Lunde

Kakk egget og ha det i den kokte pastaen. Rør rundt. Hell i scampi-blandinga og det andre og rør rundt. Spe på med fløyte. Rasp opp ei drusen tua med parmesan og rør også dette inn. Smak til med salt og pepar.

Så er gryta klar til å nytast. Ha oppraspa parmesan på bordet om gjestane vil ha litt meir. Server gjerne med godt brød til.

Her har du ei suppe som kan meir enn eit kinder- egg. Lett å laga, himmelsk på smak, mettande og ikkje minst; eit syn for auga Foto: Esther Moe

Fiskesuppe med chili

Her har du ei suppe som kan meir enn eit kinderegg. Lett å laga, himmelsk på smak, mettande og ikkje minst; eit syn for auga. Det er Jorunn Hoås som deler ei oppskrift ho ikkje lengre minnest kor ho fann. Sikkert i eit veke- blad, ler opphavskvinna, som også raust deler oppskrifta på eit enkelt suppebrød du kan setja frå morgonen av og ta igjen når du kjem inn frå skituren. Eller heim frå jobb. Oppskrifta er til 4 personar.

Dette treng du:

400 gram reker

400 gram sei

400 gram laks

2-3 kvitlauksfedd

Artikkelen held fram under annonsen.

3 raude chili

1⁄2 sellerirot

4-6 gulrøter

1 stor lauk

2 ss smør eller olje

1 l fiskekraft (vatn + buljong)

2 dl seterrømme

2 dl fløyte

Salt og pepar (drys gjerne over Maldon havsaltflak ved servering)

Graslauk eller persille

Fiskesuppe med chili Foto: Esther Moe

Slik gjer du:

Skrell gulrøtene og sellerirota og del dei i mindre bitar. Del chilien i to, fjern frøa og finhakk den. Skrell lauk og kvitlauk og hakk dette fint opp. Fres alle grønsakene i ein stor kjele, hell på fiskekraft, rømme og fløyte og la alt koka i ti minutt til grønsakene er møre. Del fisken i mindre bitar og la den trekkja i suppa rundt ti minutt. Drys over finhakka graslauk eller persille før servering.

Nysteikt brød er godt til fiskesuppa. Foto: Esther Moe

Loff

Omlag 25 g. gjær

5 dl vatn

Litt salt

Litt olje

750 g. kveitemjøl

Rør gjæren ut i lunka vatn, bland inn mjølet og elt godt. Lat deigen heva lenge, gjerne fleire timar.

Denne oppskrifta held til eit stort brød eller eit langpannebrød. Steik på 200 grader i rundt 20 minutt.

Heimelaga kvitlauksmør høyrer til.

Smakeleg måltid.

Det einaste du treng for å laga denne deilige kaloribomba er ei plate, ei gryte, litt bakepapir og ein kjølig stad. Og så ingrediensane, då. Foto: Esther Moe

Påskesnop

Her er oppskrifta på eit saltsøtt Karius og Baktus-eldorado som vil spreia glede i alle generasjonar. Til frukostdesserten, kaffien i solveggen eller som dessert.

Det einaste du treng for å laga denne deilige kaloribomba er ei plate, ei gryte, litt bakepapir og ein kjølig stad. Og så ingrediensane, då.

Slik gjer du:

Smelt 1 boks lys sirup og 2, 5 dl sukker i ei gryte.

Ha i ein boks med peanøttsmør og 200 gram honeycorn (halv pakke). Smør det ut over eit bakepapir på størrelse med ei halv langpanne og set det på ein kjøleg stad. Når det er kaldt – snu det.

Smelt to plater kokesjokolade (ei plate med lys og ei plate med mørk kokesjokolade) og ha i 2 ss olje. Smør den smelta sjokoladen ut over.

Set kaldt. Del opp i passande biter og lagra i tett boks. Kos deg, og ikkje gløym tannpussen!

Dette er ei smakfull og mektig sjokoladekake. Kaka er mjølfri og blir nesten som marengs. Foto: Marta-Brit Lunde

Påskekake

Dette er ei smakfull og mektig sjokoladekake. Kaka er mjølfri og blir nesten som marengs. Sidan det ikkje er mjøl i røra, dett kaka ned på midten når den blir avkjølt. Kaka er inspirert av Nigella Lawson si easter egg nest cake.

Kakebotn:

250 g mørk sjokolade

125 g smør

6 egg, 2 heile og 4 delte i plomme og kvite

175 g sukker

1 ts vaniljesukker

Krem:

150 g mørk sjokolade

3 dl kremfløyte

1 ts vaniljesukker

sjokolade-egg til pynt

Slik gjer du:

Sett omnen på 180 grader og smør ei form på 24 cm, og dekk botn med bakepapir.

Skjer smør i bitar og brekk opp sjokoladen og smelt det heile saman, anten i mikrobølgjeomnen eller over vassbad. La blandinga få stå å kjøla seg på benken.

Pisk så fire eggekvitar i ein bolle for seg. Når den begynner å stivna, piskar du inn omlag 100 g sukker, litt om gongen.

Ha dei fire eggeplommene og siste to heile egga i ein annan bolle, samt resten av sukkeret og vaniljesukkeret, og pisk til eggedosis.

Hell så sjokoladeblandinga i ei tynn stråle opp i eggedosisen medan vispane går. Til slutt rører du forsiktig, i to- tre omgangar, inn dei stivpiska eggekvitane.

Tøm røra over i forma og sett den på nedste rilla i omnen i cirka 35 minutt. Kaka bles seg godt opp under steiking, men søkk ned som eit krater etter at den er komme ut av omnen. Fortvil ikkje, her skal herleg sjokoladekrem få plass.

Medan kaka kjølnar lagar du kremen. Brekk sjokoladen i mindre bitar og smelt den i mikrobølgjeomnen eller over vassbad. Kjøl ned blandinga utan at den stivnar igjen.

Pisk kremfløyte og vaniljesukker litt stivt. Tilsett så sjokoladeblandinga i ei tynn stråle. Fyll kakekrateret med sjokoladekremen og pynt med fargerike sjokolade-egg på toppen.

Fyll kakekrateret med sjokoladekremen og pynt med fargerike sjokolade-egg på toppen. Foto: Marta-Brit Lunde