Utsikt frå Herrskår

Ta turen til Herrskår, og kan henda like til Søndagsnuten?

Herrskår (gjerne Hærskår på kart) er ei langstrekt hylle, som hogd ut av dei blankslipte berga som stuper i Suldalsvatnet utanfor Nes. Du skulle kanskje ikkje tru her var kommande for andre skapningar enn fuglar eller til nauds geit, men faktum er at her oppe går den gamle ferdavegen mellom Nes og Hamrabø. Herrskår er ikkje mindre enn eit eventyrrike med sin lette sti gjennom ein heilt spesiell natur, med kultur og storslagen utsikt som bonus.

Denne saka stod på trykk i avisa 25. november 2006

Me parkerer der vegen går opp til dynamittlageret bak Kjeldehammar. Oppe ved lageret følgjer me den merka stien eit par hundre meter innover Brattlandsdalen, gjennom steingarden, til me kjem til eit vegdele (granskog på høgre hand der me tar av til venstre). Herifrå slyngar stien seg opp den bratte bjørkelia, like til kleiva som er einaste tilkomst til sjølve Herrskår. Me spør oss: Var det råd å gå denne vegen med hest? Ja, kan henda kunne ein god hest fota seg gjennom kleiva, og då er resten av vegen grei skuring. For opp komne er det så lett ein sti å gå utover at det er ei lyst.

Artikkelen held fram under annonsen.

Omtrent 2,5 km lang er skåra, og det er mykje å sjå og oppleva heile vegen: Me passerer fire høyløer; først Stegaløo, så Bjønnsmyrløo, Indraløo og Ytraløo, og jammen er det ei lita på myra nedanfor og. Alle er neddotne, nokre er det mest berre mold att av. Høyet frå løene tok dei heim skåra på sledar om vinteren. I tillegg ser me ”Kokkhuset” under ein hidler, her stelte dei seg mat når dei slo og høya. Kosten kunne då ifølge Nils Hauen vera ”gammale graut og transure mjølk, så magen ville eksplodera”.

Kokkhuset

Me må frampå kanten og sjå på utsikten, men her nyttar det ikkje å vera sullen. Suldalsvegen er berre som ein strek under dei glatte berga, 400 meter under oss. Tenkja seg til at her har folk late seg fira ned i tau for å ta kje or feste. Skogen på Herrskår er ei soge for seg, ikkje veit me om trollskog som dette andre stader i kommunen. Nokre av fårene må vera skrekkeleg gamle. Her har nok ingen sett seg mon i å hogga, for tømmeret ville vore flis lenge før det kom ned til vatnet.

Vil du gjera turen litt lenger kan du gå ut til Søndagsnuten, du ser han der framme når du er kommen til Ytraløo. Lettast er han å komma oppå frå Skarstølsida. Her skal vera storslagen utsikt heim til Nes og Roalkvam. Og ein lengre tur som kan anbefalast er å gå frå Hamrabø til Nes, for eksempel frå Havrevoll via Longhaug og Skarstølen, og så heim Herrskår.

Tekst og foto: Bjarte Skipevåg

Turen er stipla i raudt.