Innspel til Stortinget om Røldal-Suldal kraft

Røldal grunneigarlag støtter primært mindretalet i Energi- og miljøkomiteen si innstilling.

Alternativt forslag til vedtak: Stortinget ber regjeringa syte for samordning av revisjonen for Røldal–Suldal kraft og Ulla-Førre anlegga. Spesielt med omsyn til om det finst synergier som gir rom for tilbakeføring og restaurering av natur i Røldal og Valdalen.

Potensiale for modernisering

Vi meiner det er eit stort potensiale for modernisering av Røldal-Suldal kraft sine anlegg og at det kan vera aktuelt å samordne desse med kraftanlegget Ulla-Førre.

Film produsert av Øystein Rabbe:

Det er samfunnsmessig viktig at at Røldal-Suldal Kraft (RSK) sine anlegg blir vurdert i ein overordna plan saman med Ulla-Førre. Det trengst ei overordna vurdering av heile vassdraget frå fjell til Suldalsvatn.

Fare

Det er fare for at RSK-anlegga og Ulla-Førre kan bli "optimalisert" kvar for seg utan ei overordna samla vurdering. Dette er veldig uheldig når det trass alt er snakk om vassdrag som har felles utløp til sjøen via Suldalslågen + Hylen. Her må samfunnsnytten totalt sett vera viktigare enn inntektene til kraftselskapa kvar for seg. Eksisterande infrastruktur med vegar, kraftverk og koblingsanlegg må nyttast og i det minste vurderast nøye før det blir sett i verk bygging av endå fleire anlegg.

Lite bra for Røldal

Tilbakeføring og restaurering av natur må vera eit absolutt krav dersom det blir sett i gang ombygging som har til hensikt å auka inntektene endå meir. Lyse Kraft DA har signalisert at dei er interessert i å bruka inntil 5 milliarder på oppgradering av RSK. Dei planane dei har presentert er dessverre lite bra for Røldal. NVE har opna revisjon både i Ulla-Førre og Røldal-Suldal dessverre utan å krevja ei overordna samordning av potensiale for å nytta vatnet smartare. Vassdraget er lakseførande med krav om minstevassføring noko som uansett krev samordning.

Snevert revisjonsreglement

Det er spesielt viktig at Storting og Regjering sørger for at det også blir vurdert om vatnet kan nyttast smartare i eit miljøperspektiv der tilbakeføring og restaurering av natur blir prioritert. Dagens revisjonsreglement frå OED og NVE er for snevert og evner ikkje å utnytta dei store synergier som det ligg til rette for ved samordning av desse store kraftanlegga. Regelverket for revisjon tillet ikkje endring av reguleringsgrensene (HRV og LRV) i magasina. Dette er eit hinder for å kunna få til restaurering av natur og smartare utnytting av vasskraftresursane. Det er berre Storting og Regjering som kan ordna opp i dette. Det er eit absolutt krav at ein eventuell søknad frå Lyse Kraft DA om bygging av nye kraftverk og/eller effektverk basert på eksisterande reguleringsmagasin må utløysa full konsesjonsprosess for reguleringsanlegget til RSK.

Røldal grunneigarlag Røldal 28. januar 2023

Olav S. Rabbe, leiar