Her er ein engasjert Espen Skålheim i sving med å visa Sauda-jentene rundt i kraftstasjonane. Espen er snart ferdig med sine fire år som YSK-lærling og er klar for fagprøven. Han kan ikkje få skrøyta nok over Statkraft som arbeidsplass.

Vann guida tur til krafta

På yrkesmessa i haust lodda Statkraft ut eit besøk til to av sine kraftverk i Suldal. Premien blei nyleg innkassert, og dei to vinnarjentene frå Sauda var overraska over alle jobb-moglegheitene som finst i eigne trakter, og ikkje minst over kor fint det er inne i kraftstasjonane.

Publisert Sist oppdatert

– Det er viktig for oss å visa dei unge som skal studera kva dei kan jobba med her heime, seier Marita Ims, som jobbar med teknisk dokumentasjon i Statkraft.

Store moglegheiter rundt novene

Statkraft er Europas største leverandør av fornybar energi, og skal samla investera svimlande 77 milliardar kroner i Norge. Mange av dei prosjekta skjer like rundt novene våre, og til det treng dei eit breitt spenn av kompetanse.

– Då er det er viktig at me syner kven me er, og kva me kan tilby av varierte jobbar her lokalt, fortel Ims.

For å nå ut til den ønska målgruppa, skipa selskapet ein konkurranse under Yrkesmessa der premien var ei utflukt til to kraftstasjonar i Suldal. Mange prøvde lukka, og vinnarane blei dei to Sauda-jentene Kamilla Løland og Silje Åbø.

Engasjement skapte interesse

På Sauda vidaregåande skule har Kamilla Løland fått lurt seg ut av timen sin for å snakka med avisa. Ho går andre året på studiespesialisering og har aldri tenkt at kraftindustri var noko som interesserte henne noko noko særleg.

– Det var veldig bra at det var ein ung mann som viste oss rundt. Han var så engasjert og kunne sakene sine godt. Det gjorde til at til og med eg blei interessert i noko eg aldri hadde komme til å setja meg inn i elles, seier ho.

17 åringane Kamilla Løland, til venstre og Silje Åbø vann ein guida tur i kraftstasjonane i Suldal. Jentene var overraska over moglegheitene for jobb her lokalt, samt kor fint og lyst det var i stasjonane.

Lyset traff i fjellet

Dagen starta med ein kort informasjon i Prestavikjo der guide for dagen, Espen Skålheim, delte ut hjelm og vest før turen kunne starta. Første stopp var vasskraftverket i Kvilldal.

– Der køyrde me inn i fjellet. Berre det var fascinerande. Espen hadde fortalt oss at det var stort der inne, men at det var så svært, hadde me aldri sett føre oss. Det var heilt sprøtt å stå i den nedste etasjen og kikka heilt opp, seier Kamilla.

Vidare gjekk turen opp til Saurdal. Dette kraftverket imponerte også, fortel Kamilla:

– Du veit når du tenker på anleggsplassar, så er det litt sånn grått og skittent. Men her var det eit heilt fantastisk lys. At dei har brukt led-lys og laga den fine stemninga, det traff oss jentene, kan du seia.

Meir enn menn i bil og kontordamer

Om Statkraft blir hennar framtidige arbeidsplass er ho noko usikker på akkurat nå, men synest det er fint å vita at her er så mange moglegheiter utover det ein gjerne tenker.

– Ein tenker fort at Statkraft er mennene som køyrer rundt og jobbar på kraftverka og kontorfolk som servar dei, men slik er det jo ikkje, veit eg nå. Eg trur Silje som går på elektro, fekk noko å tenka på, seier Kamilla.

Kamilla Løland er godt nøgd med utflukta til Suldal og veit nå at Statkraft byr på mykje meir enn ho først trudde. – Eg hadde aldri sett meg inn i dette hadde eg ikkje vunne, så må eg seia at Espen Skålheim var ein dyktig og engasjert guide.

– Kult at jentene vann

YSK-lærlingen Espen Skålheim, som desse dagar førebur fagprøven som nærmar seg, synest dagen med damebesøk på jobben var strålande.

– Ja, det var ein skikkeleg bra dag. Så var det så kult at det var to jenter som vann. Det er kjekt å få visa at Statkraft er mykje meir enn mennene ein ser rundt om i bilane sine. Eg trur dei blei litt øvegidde ja, sier han.

Sjølv visste han lite om Statkraft før han byrja som lærling, nå er han glad for å få bidra til at fleire får vita om den kjekke arbeidsplassen hans.

– Ja, nå har eg blitt ein skikkeleg Statkraft-ambassadør, reklamerer han.

Powered by Labrador CMS