E134 i Etne blir opna tidlegast neste onsdag
Søndag gjekk eit stort steinras på E134 i Etne i Vestland. Det står att eit krevjande oppryddingsarbeid, og vegen blir opna tidlegast onsdag neste veke.
Det melder Statens vegvesen.
Komplisert arbeid
Annonse
– Det er eit omfattande og krevjande arbeid som må gjerast før me kan opna E134 for trafikk igjen, seier avdelingsdirektør Svenn Egil Finden.
Sidan raset gjekk søndag, har geologar vore på staden for å kartleggja risiko i fjellområdet. Arbeidet har vore komplisert, ifølgje Finden. Geologane ser det som nødvendig å ta ned nokre usikre delar av fjellet.
– Dette for å tryggje trafikantane som ferdast på E134 og lokalmiljøet, seier avdelingsdirektøren.
Riksveg 13 er omkøyringsveg
Annonse
Det var klokka 10.44 søndag at politiet fekk melding om eit større steinras på E134 Haukelivegen like ved Fjæra. Sidan har vegen vore stengd. Riksveg 13 er omkøyringsveg.
– Me har diskutert ulike løysingar og av omsyn til tryggleik, har me konkludert med at dette er den beste løysinga. Me har stor forståing for ulempene dette fører med seg, men eg vil også forsikra alle om at me jobbar på spreng for å opna vegen så snart det er mogleg, seier Finden.
Sidan litt meir fjell må fjernast, kan det vera fare for at infrastruktur som vatn, straum og avløp blir påverka lokalt.
(©NPK)
