Eitt år med Sandsfjordbrua

Eitt år er gått sidan brua blei opna og trafikkmønsteret i Suldal blei endra. Kva erfaringar har suldølen gjort seg etter bruopninga ?

Denne saka stod på trykk 23. november 2016

Er det blitt som folk frykta eller håpa?

Norsk Stein

Knuseverket på Berakvam er ei av bedriftene i kommunen som har ivra mest for bru over Sandsfjorden. Driftsleiar Odd Hotvedt synest det er vanskeleg å seia om dei har merkt ei konkret endring når det gjeld rekruttering og arbeidsmarknad. Å få tilgang til ein større arbeidsmarknad er ein av fordelane dei meinte brua ville føra med seg.

– Me har vel ikkje merkt nokon stor forskjell når me har lyst ut stillingar, seier Hotvedt og sikter til fleire søkjarar frå Vindafjord og Sauda. Han legg til at bedrifter som dei leiger tenester frå, til dømes Sauda Elektro som har vaktteneste på det elektriske anlegget, har fått det mykje enklare med døgnopen veg.

Nærare Helganes

Også for forretningsforbindelsar som kjem med fly, er det blitt enklare, meiner driftsleiaren. Han seier at dei aller fleste som kjem til dei med innanlandsfly, nå brukar Helganes i staden for Sola.

Han trekkjer òg fram auka ferjefrekvens mellom Nesvik og Hjelmeland. Den gir mindre ventetid og ein lettare kvardag for bedrifta når det gjeld tilreisande servicefolk og levering av delar.

– Større fridom

Det er det første Åse Lill Sildelid svarer når ho får spørsmålet om kva brua betyr for henne. Ho bur i Vatlandsvåg og jobbar på avdeling for psykisk helse på Sand. Å sleppa å tenkja på at ho skal nå ferja, kjennest skjønt. Ho brukar kortare tid til og frå jobb, men noko av det beste, er at ho kjem seg heim frå jobb på helgedagar og i høgtider.

– Eg har opplevd å jobba julaftan fram til klokka 22, og då var det ikkje mogleg å komma seg heim igjen på kvelden. Slik var det på alle raude dagar, fortel ho. For Sildelid er det ingen ulempar med nytt køyremønster, ho ser berre fordelar.

– Og så har eg begynt å syngja i kor på Sand, måndagskveldane. Det er mykje lettare for meg å reisa til Sand på kveldstid, sluttar ho av.

Glad for flexi-tid

– Det er blitt som forventa, seier Marianne Hustveit Nes. Ho jobbar på Suldal Økonomi og pendlar kvar dag mellom Vikedal og Sand. I tid reknar ho med at det tar ti minutt lenger, på fint føre, å komma seg fram. Då bruker ho 50 minutt på turen. Når ho ligg bak store køyretøy, det er mørkt og dårlege vegar, er ho glad for at ho har flexitid slik at ho slepp det stress-elementet.

– Det har vore fokusert mykje på dei som pendlar mellom Sand og Sauda og lite på oss som kjem frå Vindafjord. Å reisa kollektivt til og frå jobb, er ikkje mogleg nå etter at brua kom, meiner Hustveit Nes og konstaterer tørt at buss frå Vikedal 6.20 er ein dårleg kombo med levering av barn i barnehagen. Og å reisa heim kollektivt er umogleg, då går det rett og slett ingen buss.

Hurtigbåten

Hustveit Nes skulle ønskt det kunne la seg gjera å reisa kollektivt og slår eit slag for westamaranen.

– Tenk om hurtigbåten kunne tatt den ekstra turen over fjorden. Eg skulle blitt supernøgd! Då kunne eg parkert på Ropeid og fått det så mykje enklare, sukkar ho, men legg til at alt går så lenge ein har det kjekt på jobb.

Må snakka med Kolombus

Rådmann Øyvind Valen lufta fjordkryssinga og utfordringar i arbeidsmarknaden i sist kommunestyremøte. Foreløpig er ein ekstra tur over fjorden for weatamaranen berre eit forslag i budsjettarbeidet.

Valen meiner kommunane Suldal og Sauda har ein jobb å gjera i samtaler med Kolombus. Då tenkjer han på å få betra kollektivtilbodet til og frå Haugesund, i tillegg til ekstra fjordkryssing for pendlarar.

– Det må vera eit mål å få like mange bussruter frå Haugesund til Sand, som det Sauda har.

Færre søkjar

Rådmannen kan ikkje stadfesta noko tal på kor mange som har sagt opp jobben sin i Suldal kommune på grunn av reisevegen.

– Me høyrer i intervju og personalsamtalar at mange oppfattar pendlarsituasjonen som vanskelegare nå. Dette er også tilbakemeldingar me får frå dei ulike einingsleiarane, seier rådmannen og legg til at dei ser på utlyste stillingar at det er færre frå Sauda som søkjer jobb i kommunen enn før.

Ryfylke Fjordhotel

For to år sidan hadde leiarduoen Erling og Tina Cosette Asbjørnsen ikkje tru på at det nye trafikkmønsteret ville endra hotell-drifta radikalt, men dei var sjølvsagt spente.

Nå, etter eitt år utan ferja som næraste nabo, kan dei slå fast at endringa ikkje har vore stor.

– Me vil få tydelegare svar om eitt år eller to, meiner Erling Asbjørnsen. Tilbakemeldingane dei får frå dei fleste gjestane frå Haugalandet og frå sør-fylket, er at hotell-vegen er blitt mykje lengre enn før. Asbjørnsen er spent på kva det vil føra til neste gang gjestane skal velja seg hotell.

Mest i hovudet

Sjølv om reisa i tid ikkje er mykje lenger, seier Asbjørnsen at mange følte dei var framme når dei var på kaien på Ropeid.

– Så at det er blitt så mykje lenger, sit nok mest i hovudet, smiler han og konstaterer at alt er ein overgang. På spørsmål om brua har ført til noko betre for deira daglege drift, svarer han kontant nei.

Lenger køyretid

Bjørn Benninghoff, seksjonsleiar i Helse Fonna, meiner òg at den lengre reisetida ikkje er av særleg betyding.

– Ambulansen bruker lenger tid over fjorden, men me venner oss til det. Og det positive er jo at me har fått endå raskare responstid til Ropeidhalvøya, seier han.

Trafikkauke?

Statens Vegvesen kalkulerte før brua kom, med 450 passerande køyretøy i døgnet. Noko som ville auka til 600 køyretøy om femten år. Så langt har Statens Vegvesen ikkje nye teljingar på trafikken på dette strekket.