Helikopterlandingar på Hardangervidda blir tema på Stortinget
Raudt-representant Sofie Marhaug har stilt spørsmål til klima- og miljøminister Andreas Bjelland Eriksen (Ap) om det vil bli sett i verk tiltak for å avgrensa talet på helikopterlandingar på Hardangervidda.
Bakgrunnen er tal som Vest-Telemark blad har samla inn, som viser at over 1500 helikopter fekk løyve til å lande på Hardangervidda i fjor.
I utgangspunktet forbode
Annonse
Marhaug peikar på at dette er svært mange landingar, sett opp mot regelverket for nasjonalparken. I verneforskrifta er motorferdsel i utgangspunktet forbode, og skal berre nyttast når det er strengt nødvendig.
Det er tilsynsutval i dei aktuelle fylka som har ansvar for å gi dispensasjonar til slike flygingar.
Marhaug viser til at Hardangervidda er verna på grunn av naturverdiane i området. Ho trekkjer særleg fram villreinen, som er klassifisert som nær trua og rekna som ei ansvarsart for Norge. Svaret frå statsråden er førebels ikkje offentleggjort.
