Hudd vil konkurrera ut Facebook

– Vi skal vere ekte og autentiske, vi skal ha dialog og konstruktive debattar utan dritslenging, ha ein sivilisert tone og det skal vere totalt fråvær av falske bottar og utanlandsk påverknad. Altså det stikk motsette av Facebook, slår gründer Eigil Arff Tarjem fast overfor Nynorsk pressekontor når han fortel om den sosiale nettfellesskapen Hudd.

Hudd-grunnleggjaren merkar at stadig fleire har vorte opptekne av dei negative sidene ved Facebook, og at mange leiter etter eit alternativ.

Ingen algoritmar

Tarjem er derfor overtydd om Hudd kjem til å bli skikkeleg store, nettopp med å gjera det diametralt motsette av det Facebook gjer. Han er sikker på at folk ønskjer eit sosialt medium der dei kan halde kontakt med vener og familie, og som ikkje er styrt av algoritmar og uønskt reklame.

– Ein gong var eg veldig glad i sosiale medium. Då Facebook kom var eg i militæret i Nord-Norge og det var ein fantastisk måte å halda kontakten med vener og familie på. Slik Facebook og andre Meta-plattformer har utvikla seg, meiner eg dei har vorte både usosiale og destruktive. Ikkje berre på individnivå, men også for heile samfunnet, seier Tarjem.

Hudd har ein kjerneverdi. Ingen algoritmar skal styre det brukaren møter der. Ein må aktivt finne innhaldet ein ønskjer sjølv, og ein skal berre møte innhald frå dei ein vil ha innhald frå i ei kronologisk rekkjefølgje. Her er det ingen annonsar som blandar seg inn. I tillegg er det verifisering av alle brukarar gjennom Bank ID eller Vipps, slik at det ikkje er mogleg å laga falske profilar.

Ny direktør

Eigil Arff Tarjem har økonomisk utdanning og jobba ti år i finansnæringa før han starta eit selskap der privatpersonar kan kredittsjekke seg sjølve. Etter fire år selde han selskapet og skaffa seg eit økonomisk grunnlag for å starta Hudd.

Han fekk med seg nokre medarbeidarar frå selskapet han selde i tillegg til nyttig lærdom frå oppstarten der. I dag er det åtte personar som jobbar med Hudd i Oslo i tillegg til dei 30 som jobbar med utvikling i Ukraina, Latvia og London.

– Vi kjem til å tilsetja stadig fleire her i landet. Vi har nettopp tilsett Anders Frogner som ny administrerande direktør, slik at eg kan konsentrere meg om utviklinga av produktet. Frogner har erfaring frå Scandinavia Online, Apsis, Semway og Twitter, opplyser Tarjem.

Aukande medlemsmasse

I dag har Hudd rundt 200 000 brukarar, og det har skjedd utan at dei har brukt ei krone på marknadsføring. Likevel veks talet på brukarar med 10 000 i månaden.

– Målet er ein million brukarar i løpet av året, og då blir vi stadig meir interessante. Når vi kjem opp i 300 000 vil tyngdekrafta byrje å jobba for oss for alvor. Da vil det blir skapt meir relevant innhald på Hudd enn på Facebook. Vi har berre halde på i to år. Når dette året er omme trur eg Hudd vil vere eit godt tilbod til dei aller fleste, seier han.

Selskapet går enno med underskot, men inntektene aukar stadig. Ein del brukarar betaler fordi dei likar oppdraget, og det er småbedrifter som betaler for profilering. Det er også nokre store partnarskap som KLP og Verisure.

Også det offentlege har byrja å bruka Hudd som sosial plattform, slik som til dømes Riksantikvaren og Bymiljøetaten i Oslo.

For dei fleste

– Tidlegare meinte eg at ei 15-årsgrense for bruk av sosiale medium var bra, men eg har endra syn etter å ha snakka med blant anna Redd Barna. Det kan vere betre med eigne barneprofilar, som foreldra lagar og med avgrensa tilgangar. Då blir det mogleg å bli med i familiechatten, ha kontakt med vener og skule. Det handlar om å gjera digital sosialisering sunnare, seier Tarjem.

Han meiner at Hudd i løpet av 2026 vil vere eit godt alternativ for dei aller fleste.

Hudd har utvikla ein eigen app, samstundes som dei også ligg på nettadressa hudd.no. Den sosiale plattforma har også tilbod til nynorskbrukarane. Dette var noko mange privatpersonar, organisasjonar og bedrifter hadde venta på. Og Hudd på nynorsk har fått ei varm mottaking etter lanseringa.

I dag er Hudd representert i dei nordiske landa, men ambisjonen er å veksa også til resten av Europa og vidare ut i verda.