I dag blir Nødvarsel testa – mobilar og tyfonar vil ula og bråka

I dag blir Nødvarsel testa på mobil og Sivilforsvarets varslingsanlegg over heile landet. Det betyr mellom anna at mobilen din kjem til å ula og vibrera.

Det er politiet som sender ut test av Nødvarsel på mobil, medan Sivilforsvaret testar tyfonane med signalet «Viktig melding – søk informasjon».

Varslingsprøva blir gjort over heile landet rundt klokka 12, ifølgje Direktoratet for samfunnsberedskap (DSB).

Dette er andre gong at nødvarsling på mobil blir testa.

Fleire fekk ikkje varselet

Første gong var i juni i fjor. Den gong var det fleire som ikkje fekk varselet.

– Mange av dei som ikkje fekk nødvarsel sist, hadde ikkje oppdaterte telefonar. Me minner derfor spesielt om at for å kunna få nødvarsel på rett måte, så må du ha ein nyleg oppdatert mobiltelefon, seier direktør Elisabeth Aarsæther i DSB.

For å unngå varselet, må du slå av telefonen eller setje den i flymodus frå klokka 11.55 til 12.15.

Nødvarsel på mobil blir testa til heile befolkninga både for å gjera folk kjent med korleis det blir opplevd å få eit slikt varsel og for å sikra at systemet fungerer som det skal. I ein reell situasjon inneheld eit nødvarsel informasjon om kva som skjer, og kva du bør gjere for å verna deg sjølv.

Tre seriar med tuting

Tyfonane blir testa kvart halvår, den andre onsdagen i januar og den andre onsdagen i juni. Testing av tyfonane blir gjort for å avdekkja tekniske feil og for å gjera befolkninga kjend med lyden og signalet.

Signalet består av tre seriar med tuting med eitt minutts opphald mellom seriane.

Viss du høyrer dette signalet, betyr at du skal søkja informasjon. Informasjon om kva som skjer og korleis du skal stella deg, blir gitt gjennom ulike medium, til dømes radio, TV, nettsidene til styresmaktene og sosiale medium.

(©NPK)