MS Jøsenfjord totalskadd i brann ved museum i Hardanger
Ein brann i ein båt frå 1886 spreidde seg til to andre båtar ved kaien til Hardanger Fartøyvernsenter i Kvam kommune. To av båtane er totalskadde.
Vest politidistrikt vart varsla om brannen klokka 3.18 natt til torsdag.
Inga spreiing til bygningsmasse på land
Annonse
– Brannen har no spreidd seg litt vidare til noko bygningsmasse på kaianlegget ved båten. Ukjent omfang og kva type bygg dette er per no. Så langt inga spreiing til bygningsmasse på land eller til busette bustader, skreiv operasjonsleiar Frode Kolltveit.
Det er ikkje meldt om personskadar, og heller ikkje om nokon personar om bord i båtane. Klokka 4.20 melde politiet om kontroll på brannen.
– Noko av det verste
Hardanger Fartøyvernsenter omtaler seg som Nordens største fagmiljø på restaurering av historiske fartøy.
Annonse
– Dette er jo noko av det verste som kan skje, seier direktør Åsmund Kristiansen til NRK.
– Å få brann på eit museumsanlegg er jo kritisk, og når det er to kulturminne som brenn så er det tragisk, legg han til.
MS Jøsenfjord og NB Tafjord
Fartøya som er utbrent, er MS "Jøsenfjord" og NB "Tafjord". Brannen starta ifølgje brannvesenet i førstnemnde.
Ifølgje nettsida til Jøsenfjord rutelag AS vart førstnemnde bygde i 1886 i Oslo. Båten gjekk først på damp, men vart bygd om til dieseldrift i 1934, og motoren frå den gongen stod framleis i båten.
(©NPK)
