Regjeringa skal greie ut flytte-forbod for flyktningar

Sekundærflytting er omgrepet for når flyktningar som er busette i ein kommune, flyttar til ein annan kommune. Det skjer særleg dei første fem åra, ifølgje regjeringa.

Behov for endringar

– Det er uheldig når mange flyktningar flyttar til dei same områda utan å ha ein stad å bu eller ein jobb å gå til. Derfor er det behov for å gjera endringar. Me vil nå sjå på to ulike moglegheiter for å avgrensa uønskt sekundærflytting, seier arbeids og inkluderingsminister Kjersti Stenseng (Ap).

Dei skal no greie ut eit forbod mot å flytta til enkelte område, men også eit generelt flytteforbod frå busetjingskommunen. I begge tilfelle skal det eventuelt gjelde for ein gitt tidsperiode.

Ikkje èi enkelt løysing

Det skal bli gitt unntak om ein flyttar på grunn av utdanning, arbeid eller av omsyn til barn sitt beste. Flyktningar som blir norske statsborgarar, skal heller ikkje omfattast.

– Dette er eit problem som ikkje har éi enkelt løysing. Me må gjera fleire ting samtidig. Og det me gjer, må vera i tråd med nasjonale og folkerettslege forpliktingar, seier Stenseng.

Det er særleg enkelte område på Austlandet som opplever stor tilflytting, noko som kan føre til stor belastning på enkeltkommunar og budsjetta deira.

Forslaga skal etter planen sendast på høyring til hausten.