Rekordmange døyr i ulykker med fritidsbåt

36 personar har mista livet under bruk av fritidsbåt så langt i år. Dette er det høgaste talet på denne tida av båtsesongen på nesten 20 år.

– Nesten heile auken siste året har skjedd i aldersgruppa 61 år og eldre, og som tidlegare år er dei aller fleste omkomne menn. Den største auken har skjedd i sommarmånadene juli til september, seier seksjonssjef Petter Andre Søreng i Sjøfartsdirektoratet i ei melding til NTB.

Det har vore ein auke i både kantringar og kollisjonsulykker, og det er ingen tvil om at ruspåverknad speler ei rolle i mange av ulykkene, ifølgje direktoratet.

Ein av tre var påverka

Sidan 2017 har 220 personar mista livet i ulykker som involverer fritidsbåtar, opplyser Sjøfartsdirektoratet. 37 prosent av desse var ruspåverka.

Nå vil Sjøfartsdirektoratet redusere promillegrensa frå dagens på 0,8 for båtar under 15 meter, melder NRK. For større båtar er grensa 0,2, som for bilar.

Ver edru – bruk vest

Ulykkestala uroar konstituert sjøfartsdirektør Alf Tore Sørheim.

– Dette er alvorleg og urovekkjande høge tal, særleg for 2024 så langt. Alle som bruker fritidsbåt, må også bidra med å bli flinkare til å tenkja tryggleik. Bruk flytevest, ver edru, ha med deg VHF eller mobil, og ta omsyn til vêr og vind.

Etter 2001 har det vore ein jamn nedgang i talet på omkomne ved bruk av fritidsbåt, men dei siste ti åra har nedgangen flata ut, og dei siste åra har tala vore høgare igjen.

(©NPK)