Skal du sjå alle VM-kampane? – «Draumejobben» er på marknaden
Éin person skal påskjønnast med nær ein halv million kroner for å sjå alle 104 VM-kampane i ein boks på Times Square i New York.
Det er rettshavar Fox Sports som har lyst ut det som for mange fotballelskarar enkelt kan beskrivast som ein historisk sommarjobb.
Heftig lønn
Annonse
Stillinga, som i annonsen blir omtalt som «sjef for VM-sjåing», kjem også med ei heftig lønn. For 39 dagar med jobb får ein betalt ikkje mindre enn 50.000 dollar (462.669 kroner).
Men samtidig må ein sjå kvart einaste minutt av VM-festen. Personen som får jobben, skal sitja i ein gjennomsiktig boks midt i Times Square, som er ein av dei travlaste stadene i USA.
"Once in a lifetime"
– Det vil vera den beste sommarjobben på marknaden, men berre for ein vill supporter som er villig til å få denne «once in a lifetime»-opplevinga, skriv Fox i pressemeldinga.
Annonse
Interesserte fotballfans kan søkja på jobben gjennom rekrutteringsselskapet Indeed. Den utvalde vil få beskjed 6. juni undervegs i Fox’ sending av baseballkampen mellom Boston Red Sox og New York Yankees.
Første dag på jobb blir 11. juni for å sjå kampen mellom Mexico og Sør-Afrika. VM varer fram til finalen utanfor New York 19. juli.
Noreg skal i puljespelet møta Irak, Senegal og Frankrike.
(©NPK)
